دہلی اسمبلی کا تیسرا دن، بی جے پی نے بے گھروں کی موت پر بحث کا مطالبہ
نئی دہلی،17؍جنوری (ایس او نیوز؍آئی این ایس انڈیا) بی جے پی نے قومی دارالحکومت میں بے گھروں کی مبینہ موت کو لے کر دہلی اسمبلی کی کارروائی میں آج رکاوٹ پیدا کی ۔جب کہ رین بسیروں کا انتظام کرنے والے رہائشی بورڈ نے اس الزام کو مسترد کیا ہے۔ اپوزیشن لیڈر وجیندر گپتا کی قیادت میں بی جے پی ممبران اسمبلی نے اسمبلی کے صدر رام نواس گوئل کی کرسی کے پاس آکر اس معاملے پر بحث کا مطالبہ کیا ؛لیکن انہوں نے ان کی مانگ ٹھکرا دی۔ جواب میں آپ کے ممبران اسمبلی نے دلتوں کے خلاف ظلم اور خصوصی سی بی آئی جج بی ایچ لویا کی موت کا معاملہ اٹھا کر ان کامنھ بند کر دیا ۔ اس سے قبل آپ سے معطل اور گزشتہ سال وزیر کے عہدے سے ہٹائے گئے کراول نگر کے ممبر اسمبلی کپل مشرا کو مسلسل دوسرے دن مارشلوں کی طرف سے ایوان سے باہر کیا گیا ۔ انہوں نے آپ کے راجیہ سبھا کے امیدواروں کے پیچھے ’’ مالی لین دین ‘‘ کا الزام لگایا تھا۔ گزشتہ ہفتہ جب بے گھروں کی مبینہ موت کا مسئلہ اٹھا تھا تودہلی شہری اقامتی بورڈ نے ایک بیان جاری کرکے ایک این جی او کے دعووں کو مسترد کردیا تھا۔