نئی دہلی:17/نومبر(ایس او نیوز/آئی این ایس انڈیا)وزیر خزانہ ارون جیٹلی نے مغربی بنگال اور آندھرا پردیش کے وزراء اعلی کے ذریعہ اپنی ریاست میں سی بی آئی کی تحقیقات سے روکنے کے فیصلے پرپلٹ وارکیاہے ۔انہوں نے ہفتے کو کہا کہ جن کے پاس چھپانے کے لئے بہت کچھ ہوتا ہے ،وہی سی بی آئی کو اپنی ریاست میں داخل ہونے سے روکتے ہیں۔ارون جیٹلی نے کہا کہ ایسے لوگوں کو ڈر ہے کہ ریاست میں تحقیقات کے لئے سی بی آئی کے آنے سے ان کے بہت سے کارنامے سب کے سامنے آ سکتے ہیں۔انہوں نے کہا کہ ایسی کوئی ریاست نہیں ہے جہاں بدعنوانی نہیں ہوتی ہو۔ایسے میں سی بی آئی کو روکنا، خود کو بچانے کی کوشش کر نا ہے۔
قابل ذکر ہے کہ اس سے پہلے ممتا بنرجی اور چندرابابو نائیڈو نے اپنی اپنی ریاست میں تحقیقات کیلئے سی بی آئی کو دی گئی عام رضامندے کو واپس لے لیا تھا۔اس کے بارے میں اپوزیشن نے الزام لگایاکہ مرکز میں نریندر مودی حکومت کی طرف سے مرکزی اداروں کے غلط استعمال کی وجہ سے ریاستوں کا اعتماد کم ہورہاہے۔
سی بی آئی اب ان ریاستوں میں عدالتی احکام والے معاملات اورم اور مرکزی حکومت کے حکام کے خلاف مقدمات کوچھوڑکر کسی قسم کی تحقیقات کے لئے ریاستی حکومت کی اجازت کی ضرورت ہوگی۔آندھرا پردیش میں تیلگو دیشم پارٹی کی حکومت ہے جس کے مکھیاچندرابابو نائیڈو ہیں جبکہ ممتا بنرجی مغربی بنگال میں ترنمول کانگریس کی حکومت ہے۔