نئی دہلی10فروری ( ایس او نیوز؍آئی این ایس انڈیا ) کانگریس پردفاعی فورسز، عدلیہ اور ریزرو بینک کے خلاف فرضی مہم چلانے کا الزام لگاتے ہوئے مرکزی وزیر ارون جیٹلی نے اتوار کو کہا کہ ملک اور ملک کے آئینی اداروں کو برباد کرنے والوں سے بچانے کا وقت آ گیا ہے۔

وزیر نے فیس بک پوسٹ میں الزام لگایا کہ کانگریس قیادت حکومتیں ریزرو بینک، عدلیہ اور مرکزی تفتیشی بیورو (سی بی آئی) جیسے اداروں میں مداخلت کرتی رہی تھیں۔امریکہ سے علاج کروا کے ہفتہ کو ملک واپس ہوئے جیٹلی نے کہا کہ وقت آ گیا ہے کہ ملک اور اس کے آئینی اداروں کو برباد کرنے والوں سے بچایا جائے۔

جیٹلی نے اداروں پر حملہ، تازہ ترین جھوٹ کے عنوان سے لکھے پوسٹ میں کہا کہ گزشتہ دو ماہ میں کئی فرضی مہم چلائے گئے ، جنہیں زیادہ تر توجہ نہیں ملی کیونکہ جھوٹ زیادہ وقت تک نہیں رہتا ۔ انہوں نے کہا کہ مسلسل ایک کے بعد ایک جھوٹے پروپیگنڈے مہم چلائی ۔

جیٹلی نے کہا کہ مغربی بنگال میں’ جمہوریت سنگین‘ خطرے میں ہے۔ انہوں نے کہا کہ بی جے پی کے لیڈران وہاں نہیں جا سکتے، ریلیاں روکی جارہی ہیں اور رتھ یاترا کی اجازت نہیں دی جا رہی ہے۔ ان ہی مسائل پر کانگریس کا رخ الگ ہے۔انہوں نے کہا کہ وہ جمہوریت کے لئے مگرمچھ کے آنسو بہاتے ہیں اور دنیا کی سب سے بڑی جمہوریت کو خاندانی نظام میں تبدیل کرنے کی ممکنہ کوشش کرتے ہیں ۔