ارون جیٹلی نے اندرا گاندھی کا موازنہ ہٹلر سے کیا
نئی دہلی،25؍جون (ایس او نیوز؍ آئی این ایس انڈیا ) مرکزی وزیر اور بی جے پی کے سینئر رہنما ارون جیٹلی نے آج کہا کہ محترمہ اندرا گاندھی کا ایمرجنسی میں رول جرمنی کے حکمراں ایڈولف ہٹلر کے طریقہ کار کی طرح ہوگیا تھا۔
مسٹر جیٹلی نے ایمرجنسی پر اپنے مضامین کی سریز کے دوسرے مضمون میں یہ بھی لکھا ہے کہ بعض معنوں میں محترمہ اندرا گاندھی نے کچھ ایسے کام کئے جو ہٹلر نے بھی نہیں کئے تھے۔ انہوں نے کہا کہ ہٹلر اور محترمہ گاندھی دونوں نے آئین کو کبھی نہیں مانا۔ انہوں نے جمہوری آئین کی مدد سے جمہوریت کو ڈکٹیٹر شپ میں تبدیل کیا تھا۔
انہوں نے کہا کہ ہٹلر نے پارلیمنٹ کے بیشتر اپوزیشن لیڈران کو گرفتار کیا اور پارلیمنٹ میں اقلیتی حکومت کودو تہائی اکثریت والی حکومت میں تبدیل کردیا۔ اسی طرح محترمہ اندرا گاندھی نے بیشتر اپوزیشن لیڈروں کو گرفتار کرکے ان کی غیر موجودگی میں دو تہائی اکثریت حاصل کرلی اور آئینی ترمیم کے ذریعہ کئی قابل اعتراض التزامات کو منظور کرایا۔ یہی نہیں انہوں نے پارلیمنٹ کی کارروائی کے میڈیا میں اشاعت کو پابند کیا جو ہٹلر بھی نہیں کرسکا تھا۔