نئی دہلی،24؍جون (ایس او نیوز؍ آئی این ایس انڈیا )ملک کی راجدھانی دہلی میں انتہائی محفوظ سمجھا جانے والا علاقہ کینٹ میں ایک فوجی افسر کی اہلیہ شیلجا دیویدی کے قتل کے معاملہ میں پولیس نے ہندوستانی فوج کے ایک میجر کو میرٹھ سے گرفتار کیا ہے۔ نکھل ہانڈا نام کے اس فوجی افسر کو پولیس دہلی لارہی ہے۔ ہانڈا اس سے پہلے دیماپور میں تعینات تھے اور بتایا جارہا ہے کہ مقتول کے موبائل سے آخری فون ہانڈا کو ہی کیا گیا تھا۔

خیال رہے کہ کینٹ علاقہ میں ہفتہ کو ایک خاتون کی لاش ملنے سے سنسنی پھیل گئی تھی ۔ بتایا جارہا ہے کہ یہ خاتون ہفتہ کی صبح 10 بجے فیزیو تھیراپی سیشن کیلئے آرمی اسپتال گئی تھی ۔ تاہم کچھ وقت بعد جب ڈرائیور خاتون کو واپس لے جانے کیلئے اسپتال آیا تو اسے معلوم ہوا کہ وہ وہاں فیزیو تھیراپی کیلئے آئی ہی نہیں تھی۔ شام چار بجے تک جب خاتون گھر نہیں لوٹی تو اس کے شوہر نے پولیس میں اپنی اہلیہ کی گمشدگی کی رپورٹ درج کرائی ۔

پولیس نے بتایا کہ ہفتہ کو انہیں خبر ملی تھی کہ ایک خاتون کی سڑک حادثہ میں موت ہوگئی ہے۔ وہاں پہنچ کر جب انہوں نے لاش کا معائنہ کیا تو معلوم ہوا کہ اس کا گلا کاٹ کر قتل کیا گیا ہے۔ اس کے کپڑے بری طرح سے پھٹے ہوئے تھے ۔ پولیس کی جانچ میں پتہ چلا کہ قتل کے بعد لاش کو گاڑی سے بھی روندا گیاتھا۔