مفرور اقتصادی فوجداری بل لوک سبھا میں منظور
نئی دہلی:19/جولائی(ایس او نیوز /ٓئی این ایس انڈیا)بینکوں سے قرض لے کر ادائیگی کئے بغیر بیرون ملک بھاگ جانے والوں کو واپس لانے اور ان کی املاک پر قبضہ کرنے سے متعلق مفرور اقتصادی فوجداری بل، 2018 آج لوک سبھا میں منظور ہو گیا۔وزیر خزانہ پیوش گوئل نے بل پر بحث کا جواب دیتے ہوئے کہا کہ اس سے بڑے مفرور اقتصادی مجرموں پر کارروائی تیز کرنے میں مدد ملے گی۔انہوں نے ایوان کو یقین دلایا کہ پہلے ملک چھوڑ کر بھاگ جانے والے اقتصادی ملزمان بھی اس قانون کے دائرے میں آئیں گے کیونکہ بل کی ضمنی دفعہ تین میں کہا گیا ہے کہ اس قانون کے وجود میں آنے کے دن جو بھی شخص " مفرور اقتصادی مجرم ہے یا مستقبل میں بھگوڑے اقتصادی مجرم بنتا ہے ۔اس پر یہ قانون نافذ ہوگا۔