کسی قابل لیڈر کو کے پی سی سی صدر بنایا جائے گا:جی پرمیشور
بنگلورو،2؍جون(ایس اونیوز) کے پی سی سی صدر ڈاکٹر جی پرمیشور نے کہاکہ کانگریس میں ایک عہدہ ایک فرد کے ضابطے پر عمل کرتے ہوئے عنقریب ان کی جگہ کسی قابل پارٹی لیڈر کو کے پی سی سی صدارت پر فائز کیاجائے گا۔ انہوں نے کہاکہ کانگریس اعلیٰ کمان کی طرف سے اس عہدے پر جس شخص کے نام کی تجویز کی جائے گی، انہیں یقین ہے کہ وہ تنظیمیں صلاحیتوں میں ان سے بھی زیادہ طاقتور ہوگا۔ انہوں نے کہاکہ جیسے ہی پارٹی کی طرف سے نئے کے پی سی سی صدر کا تقرر کیا جائے گا۔ بخوشی وہ پارٹی کی ذمہ داریاں ان کے سپرد کردیں گے۔عیسائی فرقے کے نئے آر چ بشپ پیٹر میکاڈو سے ملاقات کے بعد اخباری نمائندوں سے بات چیت کرتے ہوے ڈاکٹر پرمیشور نے کہاکہ وزیر اعلیٰ کمار سوامی کی طرف سے یہ فیصلہ خوش آئند ہے کہ سرکاری میٹنگوں میں افسران اپنا موبائل فون نہیں لائیں گے اور ان کے موبائل فون کی نگرانی کے لئے ہر میٹنگ میں ایک نگراں کا تقرر کیا جائے گا۔ گوری لنکیش قتل کے معاملے میں ڈاکٹر پرمیشور نے کہا کہ اس سلسلے میں چارج شیٹ داخل کردی گئی ہے توقع ہے کہ جلد ہی تحقیقات مکمل ہوجائیں گی۔ ڈی کے شیوکمار اور رکن پارلیمان ڈی کے سریش اور ان کے اقرباء کے ٹھکانوں پر سی بی آئی کے چھاپوں کی مذمت کرتے ہوئے ڈاکٹر پرمیشور نے کہاکہ ان دونوں کے اقرباء پر سی بی آئی دباؤ ڈال رہی ہے کہ کسی غلط معاملے میں ان دونوں کا نام ظاہر کیا جائے۔ انہوں نے کہاکہ تحقیقات کی آڑ میں اس طرح کا دباؤ ڈالنا درست نہیں ہے۔