انوراگ تیواری کی موت کو بی جے پی سیاسی رنگ میں رنگنے کوشاں: پرمیشور
بنگلورو:22/مئی (ایس او نیوز) لکھنؤ کے حضرت گنج کے ایک گیسٹ ہاؤز کے باہر کرناٹک کے آئی اے ایس آفیسر انوراگ تیواری کی مشتبہ حالت میں موت کے معاملے کو بی جے پی سیاسی رنگ دینے کی کوشش کررہی ہے۔ یہ بات آج وزیر داخلہ ڈاکٹر جی پرمیشور نے کہی۔ کمار کروپا گیسٹ ہاؤز میں اخباری نمائندوں سے بات چیت کرتے ہوئے انہوں نے کہاکہ آئی اے ایس آفیسر انوراگ تیواری کی موت کی اصل وجہ ہر کوئی جاننا چاہتا ہے۔ حکومت بھی یہی چاہتی ہے کہ اس کی سچائی سامنے آئے۔اس کیلئے جو بھی تحقیقات درکار ہو کرائی جائے، حکومت کواس پر کوئی اعتراض نہیں۔ انہوں نے کہا کہ حکومت کی اس وضاحت کے باوجود بھی بی جے پی قائدین غیر ضروری طور پر اس معاملے پر سیاسی فائدہ حاصل کرنے کی کوشش کررہے ہیں۔اترپردیش میں بی جے پی کی ہی حکومت ہے اسی لئے وہاں کے وزیر اعلیٰ اگر چاہیں تو معاملے کی سی بی آئی جانچ کے احکامات صادر کریں، حکومت اس جانچ میں تعاون کرنے تیار ہے۔ اس موقع پر ڈاکٹر پرمیشور نے بتایاکہ ضلعی سطح پر کانگریس قائدین کے درمیان جو معمولی اختلافات ہیں ان تمام کو اے آئی سی سی انچارج وینوگوپال کی موجودگی میں نمٹانے کیلئے آج سے پانچ دنوں تک بیٹھک بلائی گئی ہے۔ روزانہ تقریباً چھ سات اضلاع کے لیڈروں سے وینو گوپال انفرادی طور پر ملاقات کریں گے اور تمام کو ہدایت دی جائے گی کہ ریاست میں پارٹی کو اقتدار پر لانے کیلئے اپنے ذاتی اختلافات سے بالاتر ہوکر جدوجہد کریں۔ انہوں نے کہاکہ ریاستی حکومت نے پچھلے چار سال کے دوران عوام کی فلاح وبہبود کیلئے جن اسکیموں کا نفاذ کیا ہے۔ ان کے بارے میں عوام کوجانکاری دینے اور ان اسکیموں کی بدولت عوام کے اعتماد کو اور پختہ کرنے کیلئے ہر ضلع کے لیڈر کو وہاں کے حالات کے مطابق ضروری ہدایات وینو گوپال نے جاری کی ہیں۔