بنگلورو میں بدعنوان افسران اور رشتہ داروں کے ٹھکانوں پر اے سی بی کے چھاپے
بنگلورو۔8؍دسمبر(ایس او نیوز) کالے دھن کے سلسلے میں محکمۂ انکم ٹیکس کے ہاتھ لگنے والے ریاست کے دو اعلیٰ افسران کاویری نیراوری نگم کے منیجنگ ڈائرکٹر چک رایپپا اور کرناٹکا روڈ ڈیولپمنٹ اتھارٹی کے پلاننگ آفیسر جے چندرا اور ان کے رشتہ داروں کے گھروں پر آج ریاست کے انسداد کرپشن بیورو نے غیر متوقع چھاپے مارے ۔ 30نومبر کو محکمۂ انکم ٹیکس نے ان افسران کے ٹھکانوں پر چھاپے مارکر 152کرو ڑ روپیوں کی غیر قانونی دولت کا پتہ لگایا اور ان کے پاس سے 5.7کروڑ روپے مالیت کے نئے دو ہزار روپیوں کے نوٹ برآمد کئے۔ محکمۂ انکم ٹیکس نے اپنی جانچ کے دوران دو کنٹراکٹروں کو بھی گرفتار کرلیا۔ بعد میں اس معاملے کی جانچ میں سی بی آئی اور انفورمنٹ ڈائرکٹوریٹ بھی شامل ہوگئے۔ ریاستی حکومت کی طرف سے انسداد کرپشن بیورو نے اس معاملے کی جانچ کو کافی تیزی سے آگے بڑھاتے ہوئے آج شہر اور دیگر مقامات پر بیک وقت گیارہ چھاپے مارے ۔ ان چھاپوں کے دوران نقد رقم کے علاوہ متعدد دستاویزات اور قیمتی اشیاء ضبط کرلیں۔ آج صبح پانچ بجے سے اے سی بی ٹیموں نے ان افسران کے ٹھکانوں اور ان کے رشتہ داروں کے مکانات وغیرہ پر چھاپے مارے۔ کولار ضلع کے کے جی ایف کے وویک نگر میں واقع چک رایپا کی سالی کے مکان پر چھاپہ مارکر یہاں سے بہت سارے دستاویزات برآمد کئے گئے۔ اے سی بی انسپکٹر دیویندرپا کی قیادت میں یہ چھاپہ مارا گیا۔ بنگلور کے چندرا لے آؤٹ میں واقع جئے چندرا کے مکان پر بھی اسی وقت چھاپہ مارا گیا۔ اس دوران چک رایپا اور جئے چندرا سے اس معاملے میں سی بی آئی کی طرف سے بھی مسلسل پوچھ تاچھ جاری ہے۔