بھٹکل 25/ستمبر (ایس او نیوز) یہاں رنگین کٹہ، لونا کامپلیکس کے پیچھے واقع جناب حسن ریاض خطیب کے مکان السکون میں چوری کی کوشش کا ایک اور تازہ واردات پیش آئی ہے جس میں چوروں کو جب کچھ قیمتی زیورات اور نقد رقم نہیں ملی تو کچن میں رکھے ہوئے دو اوون لے کر فرار ہوگئے ہیں۔
چوری کی واردات کا علم آج پیر شام قریب سات بجے اُس وقت ہوا، جب حسن ریاض کے رشتہ دار ذیشان خطیب نے چکرلگانے کے خاطر مکان پہنچے، مگر گھر کا دروازہ کھلا دیکھ کر وہ متحیر رہ گئے۔
فوری طور پر ٹائون پولس کو واقعے کی خبر کی، جس کے بعد پولس کی موجودگی میں گھر میں داخل ہوتے ہوئے جانچ کی تو پتہ چلا کہ دو اوون غائب ہوئے ہیں۔
گھر کے سامنے والے دروازے کو نقصان پہنچا کر دروازہ کھولا گیا ہے، جبکہ نیچے والے بیڈروم کے ساتھ ساتھ اوپری مالہ کے دو بیڈروم اور ایک ہال کی الماریاں کھلی ہوئی پائی گئیں ہیں۔ کچھ الماریوں کو لاک نہیں کیا گیا تھا، البتہ جن الماریوں کو لاک کیا گیا تھا، اُن الماریوں کے دروازوں کو نقصان پہنچا کر الماریاں کھولی گئی ہیں، مگر چونکہ الماریوں میں نقد رقم اور سونے کے زیورات وغیرہ جیسی کوئی قیمتی چیزیں نہیں تھی، اس بنا پر چوروں کو کچھ نہیں مل سکا۔
ذیشان نے بتایا کہ گھر کے سبھی افراد سعودی عربیہ میں رہتے ہیں، ابھی دس بارہ روز قبل ہی سب لوگ سعودی گئے ہیں۔ ذیشان کے مطابق وہ ہفتہ دس دن میں ایک بار گھر کا چکر لگایا کرتے ہیں کہ سب کچھ ٹھیک ٹھاک ہے یا نہیں ہے۔۔۔ آج جب چکر لگانے گھر پہنچا تو چوری کی واردات کا علم ہوا۔
پولس کی درخواست: بھٹکل پولس نے تمام لوگوں سے درخواست کی ہے کہ اگر انہیں گھر بند کرکے کہیں باہر جانا ہو تو برائے کرم پولس کو خبر کرکے جائیں کہ فلاں گھر فلاں دن سے بند رہے گا، اگر گھروالے پولس کو خبر کرکے جائیں گے تو پولس ہر رات کے گشت کے دوران اُن گھروں پر خاص نظر رکھ سکتی ہے ۔ پولس کا کہنا ہے کہ بھٹکل کے اکثر مکانات کے کمپائونڈ کی دیوار اتنی بلند ہوتی ہے کہ باہر سے کچھ بھی نظر نہیں آتا۔ اگر پولس کو پہلے سے ہی معلوم ہوجائے تو ہم چوروں پر ایک حد تک قابو پاسکتے ہیں۔
پولس نے عوام الناس سے اس بات کی بھی اپیل کی ہے کہ اگر آپ اپنے بڑے بڑے مکانات بند کرکے گلف جاتے ہیں تو کم ازکم گھر وں میں سی سی ٹی وی کیمرے نصب کرکے جائیں اس سے بھی چوریوں پر ایک حد تک قابو پایا جاسکتا ہے۔