بھٹکل:26/ نومبر (ایس اؤنیوز)عالمی سطح پر شریعت کو بدنام کرنے اور کمزور کرنے کی جو سازشیں رچی جارہی ہیں اس کا ہمیں کما حقہ شعور ہونا چاہئے۔ حالیہ دنوں میں عرب ممالک کی طرف سے جو فیصلے لئے جارہے ہیں وہ قابل تشویش ہیں۔ اسی سے شہ پاتے ہوئے ہندوستان میں بھی شریعت سے کھلواڑ کرنے کی کوشش کی جارہی ہے۔ جب کہ ہندوستان کا دستور سب کو مساوی حقوق دیتاہے اور کسی بھی مذہب میں مداخلت کی اجازت نہیں دیتا۔ ان خیالات کا اظہار مرکزی خلیفہ جماعت المسلمین بھٹکل کے چیف قاضی مولانا خواجہ معین الدین اکرمی مدنی نے کیا۔

وہ یہاں خلیفہ جامعہ مسجد میں منعقد ہ مرکزی خلیفہ جماعت المسلمین بھٹکل کے سالانہ جلسہ میں اہم خطاب کررہے تھے۔ مولانا نے کہاکہ اللہ تعالیٰ نے انسانوں کی بھلائی اور ہدایت کے لئے اللہ کے نبی ﷺ کے ذریعے جو قانون نازل کیا ہے  وہ اتنا سادہ وسہل ہے کہ ہر انسان اس پر عمل کرتے ہوئے زندگی و آخرت میں کامیابی حاصل کرسکتاہے۔ مثال کے طورپر طلاق ثلاثہ مسئلہ کو کافی اچھالا جارہاہے ،  جب میاں بیوی کو اپنے اختلافات کے باعث الگ ہونے کا سب سے آسان طریقہ یہی ہے اس کے سوا دنیا میں  کوئی اور طریقہ مناسب ہوہی نہیں سکتا۔ مولانا نے مسلمانوں سے اپیل کی کہ وہ مسالک، مذاہب جیسے فروعی معاملات کی بنا پر آپسی اختلافات کا شکار ہونے کے بجائے قرآن و حدیث کی بنیاد پر متحد ہو کر حالات کا مقابلہ کریں کیونکہ امت مسلمہ کے اتحاد سے ہی ملک میں اسلام کا بول بالا ہوگا ۔

جماعت کے دستور میں ترمیم کرتے ہوئے جمعہ وغیرہ کے اہم خطبا ت کا کنڑا ترجمہ کرکے برادرانِ وطن میں پھیلانے کی بات لائی گئی ہے مولانا نے اس دستوری ترمیم کی بھرپور ستائش کرتے ہوئے کہاکہ وقت کی ضرورت کے مطابق یہ بڑا اہم کا م جماعت نے لیا ہے جس سے بھائی چارگی اور یک جہتی کا پیغام عام ہونے کے راستے کھلیں گے۔

جماعت کے نائب قاضی مولانا ایمن علی قمری ندوی نے خطاب کرتے ہوئے کہاکہ نوجوانوں اور بچوں کو ڈرا نے اوردھمکا نے سے تربیت نہیں ہوتی بلکہ پیار و محبت اور شفقت سے کام لیں گے تو یہ کافی نتیجہ خیز ہوگا۔ والدین میں تربیت کی صلاحیت کی کمی ہونے سے حالات بگڑرہے ہیں انہوں نے والدین سے کہا کہ وہ  از خود تربیت کی طرف توجہ دیتے ہوئے اپنے نوجوانوں اور بچوں کی نگرانی کریں

جلسہ کا آغاز مولوی فرقان صدیقہ ندوی کی تلاوت قرآن سے ہوا۔ مولوی محمد عمیر سدی باپا ندوی نے ہدیہ نعت پیش کی ۔ ڈاکٹر محمد حنیف شبابؔ نے استقبالیہ کلمات پیش کئےاورجماعت کے صدر محتشم محمد جعفر نے جلسہ کی صدارت کی۔ اسی طرح مولوی مدرک احمد حاجی فقیہ ندوی نے سالانہ رپورٹ کی خواندگی کی۔ جب کہ جماعت کے سالانہ حساب کتاب کا گوشوارہ جوباپو محمد اسماعیل نے جلسہ کے سامنے رکھا۔ طلحہ سدی باپا نے دستوری ترمیمات کو پیش کیا۔ اس موقع پر ممبران کو سوالات کرنے نیز تجاویز پیش کرنے کا موقع دیا گیا تھا،  جنرل سکریٹری جناب قمری ابوبکر سمیت دیگر ذمہ داران نے ممبران کو تسلی بخش جوابات سے نوازا،  مولوی ہارون کنڈلوری ندوی نے نظامت کے فرائض انجام دئیے ۔ مولانا محمد جعفر فقی بھاؤ ندوی کے کلمہ تشکر اور مولانا خواجہ اکرمی مدنی کی دعا  پر جلسہ برخواست ہوا۔