ممبئی ،21؍نومبر( ایس او نیوز؍آئی این ایس انڈیا )بزرگ سماجی کارکن انا ہزارے نے ایک بار پھر بی جے پی حکومت پر بدعنوانی روکنے میں ناکامی کا اعلان کرتے ہوئے عوامی سطح پر بدعنوانی مخالف مہم شروع کرنے کا اعلان کیا ہے اور انہوں نے عوام سے شریک ہونے کی اپیل کی ہے۔ ایک بیان میں انا ہزارے نے کہا کہ 2011میں شروع کی جانے والی پہلی مہم کے بعد یوپی اے سرکار نے لوک پال بل منظورکیا جسے کمزور کہا جاسکتا ہے۔نئی حکومت کے اقتدار میں آنے کے بعد عوام کی امیدیں وابستہ تھیں ،لیکن تین سال کا عرصہ گزر جانے کے بعد بھی مودی سرکار نے لوک پال ۔لوک آیکت قانون نافذ نہیں کیا ،نہ ہی بدعنوانی ختم کرنے کی کوشش کی گئی ہے۔ انہوں نے مزید کہا کہ بدقسمتی سے برسراقتدار این ڈی اے حکومت نے لوک پال قانون کی دفعہ 44میں تبدیلی کی ہے ،جس سے وہ مزید کمزور ہوچکا ہے اور ایسی صورتحال میں احتجاج شروع کرنا لازمی ہوچکا ہے۔انا ہزارے نے کہا کہ لوک پال ،لوک آیکت قانون کے نفاد اور سوامی ناتھن کمیشن کی کسانوں کے مسائل پر رپورٹ کے نفاذ اور انتخابی اصلاحات کے لیے احتجاج شروع کئے جانے کا فیصلہ کیا گیا ہے ۔ انہوں نے یوٹیوب پر اپنا پیغام نشرکیا ہے۔