بنگلورو،7؍اگست(ایس او نیوز) ریاستی محکمۂ شہری رسد کے عہدیداروں کو ہدایت دی گئی ہے کہ خط افلاس سے نیچے زندگی بسر کرنے والے خاندانوں کو پچھلی سدرامیا حکومت کی طرف سے جس طرح سات کلو چاول مہیا کرائے جارہے تھے اسی طرز پر چاول کی فراہمی برقرار رکھی جائے۔

ریاستی وزیر برائے شہری رسد وخوراک ضمیر احمد خان نے اپنے محکمے کے افسروں سے کہا ہے کہ کسی بھی وجہ سے بی پی ایل خاندانوں کو دئے جانے والے اناج میں کمی نہ کی جائے۔ افسروں نے وزیر موصوف کو بتایاکہ70لاکھ سے زائد خاندانوں کو اگر ماہانہ دو کلو افزود چاول مہیا کرائے گئے تو اس سے سالانہ ریاست کے خزانے پر چھ سے سات سو کروڑ روپیوں کا بوجھ پڑے گا۔ اس مرحلے میں وزیر موصوف نے افسروں کو ہدایت دی ہے کہ انا بھاگیہ اسکیم ریاستی حکومت کی ایک مقبول اسکیم ہے اس اسکیم کے تحت اناج کی فراہمی میں کمی قطعاً برداشت نہیں کی جائے گی۔ انہوں نے کہاکہ اس اسکیم کی وجہ سے سرکاری خزانے پر جو بوجھ پڑے گا اس کے لئے متبادل ذرائع کے نشاندہی کرنے حکومت سے گزارش کی جائے گی۔ اس سلسلے میں محکمۂ مالیات کی طرف سے ابھی کوئی رائے ظاہر نہیں کی گئی ہے۔ اس کے علاوہ ریاستی حکومت نے یہ بھی طے کیا ہے کہ آنے والے دنوں میں بی پی ایل راشن کارڈوں کے تحت جوار اور راگی کی فراہمی بھی کی جائے گی۔