انکولہ:16/ جنوری (ایس اؤنیوز) قومی شاہراہ سے متصل پُرلکی بین اور ہوسگدے کے درمیان انڈر پاس روڈ تعمیر کرنے کامطالبہ لے کر متعلقہ دیہات کے عوام نے قومی شاہراہ کا تعمیری کام روک کر سخت احتجاج کیا۔
قومی شاہراہ 66سے متصل پرلکی بین ، ہوسگدے اور اطراف کے دیہاتوں کو ایک دوسرے سے جوڑنے کے لئے انڈر پاس سڑک کی تعمیر ضروری ہے ، مگر متعلقہ راستہ نہ ہونے کی وجہ سے دیہی عوام کو تعلقہ کے مرکز آنے جانے اور پاس پڑوس دیہاتوں کے لوگوں سے ملنا جلنا مشکل ہورہا ہے ۔
احتجاجیوں نے بتایا کہ اسکول اور کالج کے بچوں اور دیہی عوام کی سہولت کے لئے انڈر پاس کی سہولت فراہم کرنے کےلئے گذشتہ ایک سال سے مطالبہ کیا جارہا تھا مگر ، وعدہ کرنے کے بائوجود آئی آر بی کمپنی نے ابھی تک انڈرپاس کی تعمیر نہیں کی ہے ۔
احتجاجیوں کا کہنا ہے کہ آئی آر بی کمپنی کی جانب سے عوام کو گمراہ کئے جانے اور جھوٹی تسلی دینے پر دیہی عوام متحد ہوئے اور سخت ناراضگی ظاہر کرتے ہوئے قومی شاہراہ کی تعمیر کے کام کو روک کر احتجاج کیا۔