انکولہ 4؍اگست (ایس او نیوز) ضلع شمالی کینرا کے انکولہ تعلقہ ہیلّور گرام میں ایک شادی شدہ خاتون نے اپنے سسر کے ہاتھوں جنسی ہراسانی سے تنگ آکر قریبی جنگل میں پھانسی لگالینے کا واقعہ پیش آیا ہے۔

اطلاع کے مطابق  جب گھر کے دوسرے تمام افراد کہیں باہر گئے ہوئے تھے تو تنہا ئی کا فائدہ اٹھا کر برہما ہری کنترا (۵۰سال) نے اپنی 20سالہ بہو کی آبروریزی کی۔ اس سے رنجیدہ ہوکر مذکورہ خاتون نے قریبی جنگل میں جاکر پھانسی لگاتے ہوئے خودکشی کرلی۔ عصمت دری کے ملزم کو انکولہ پولیس نے اڈپی ضلع کے ملپے سے گرفتار کرلیا ہے۔

موصولہ تفصیل کے مطابق خودکشی کرنے والی خاتون نے ایک سال قبل ہیرے گُتّی کے رہنے والے برہما ہری کنترا کے بیٹے کے ساتھ عشق میں مبتلاہوکر رجسٹر ڈ شادی کی تھی۔ جب بھی ماہی گیری کے لئے اس کا شوہر سمندرمیں چلا جاتا تو موقع دیکھ کر اس کا سسر اس کے ساتھ نامناسب حرکتیں کیا کرتاتھا۔مئی کے مہینے میں ایک رات جب بہو اپنے کمرے میں تنہا سو رہی تھی تو سسر برہما ہری کنترا زبردستی اس کے کمرے میں داخل ہوا اور اس کے ساتھ زنابالجبر کیا۔ اس واقعے کے بعد وہ خاتون اپنے شوہر کے ساتھ ہیلّور میں واقع اپنے مائیکے میں رہنے کے لئے آگئی تھی۔ مگر لگتا ہے کہ سسرکے ہاتھوں اپنی عصمت دری کا واقعہ وہ بھلا نہیں پائی تھی اور ذہنی ہیجان کی وجہ سے وہ اپنے گھر کے پاس والے جنگل میں اپنے ہی دو پٹے کا پھندابناکر خود کشی کرلی۔بتایا جاتا ہے کہ خودکشی کرنے سے قبل اس نے ایک تحریر چھوڑی ہے جس میں سسر کی طرف سے آبر وریزی کاتفصیل سے ذکرکیا گیا ہے۔

پولیس نے کیس داخل کرنے کے بعد کارروائی کرتے ہوئے ملپے جاکر برہماکو ماہی گیر کشتی سے گرفتار کرلیا۔ برہما کے بارے میں معلوم ہوا ہے کہ وہ تملناڈو کا رہنے والا ہے ۔ کچھ برسوں قبل کام کی سلسلے میں انکولہ آیا تھا اور پھر یہاں شادی رچانے کے بعد اس نے یہیں رہائش اختیار کی تھی۔