بھٹکل:16/ جنوری (ایس اؤنیوز)  اسلامیہ اینگلو اردو ہائی اسکول اور انجمن بائز ہائی اسکول کے 78ویں  سالانہ جلسہ میں اسلامیہ اینگلو اُردو ہائی اسکول کے ہونہار طالب العلم محمد عمر ابن جیلانی اکرمی کو ’وقار ِاسلامیہ ‘ اور انجمن بائز ہائی اسکول کے ہونہار طالب العلم  امیر ابن منیر محی الدین معلم کو’وقار ِ انجمن ‘ کے گولڈ میڈل سے نوازاگیا۔

جلسہ میں مہمان ِ خصوصی کرناٹکا اردو اکیڈمی کے چیرمن ڈاکٹر سید قدیر ناؔظم سرگروہ نے خطا ب کرتے ہوئے پچھلے سوبرسوں سے تعلیمی خدمات انجام دینے اور بھٹکل میں علم کی روشنی پھیلانے پر  انجمن حامئی مسلمین بھٹکل کی   ستائش کی ۔انہوں نے  کہاکہ تعلیمی میدان میں انجمن سنجیدگی کے ساتھ تعلیمی مسائل کو حل کرنے کے لئے کوشاں ہے۔ انہوں نے طلبا سے کہاکہ تعلیم کامیابی کے لئے نہیں بلکہ علم حاصل کرنے کے لئے سیکھیں۔ انہوں نے طلبا کو تلقین کی  کہ طلبا  جدید ٹکنالوجی کی سہولیات سے فائدہ ضرور حاصل کریں مگر اس کے غلط استعمال سے دور بھی رہیں۔ تاج الدین عسکری جلسہ میں اعزازی مہمان کے طورپر ڈائس پر موجود تھے۔ انجمن کے نائب صدر سید عبدالرحمن باطنؔ نے جلسے کی صدارت کی۔

جلسے کا آغاز محمد عمر کی تلاوت قرآن سے ہوا۔ محمد شعیب نائطے نے ہدیہ نعت پیش کی۔ طلبا نے انجمن کا ترانہ مترنم آواز میں سنایا۔ اسلامیہ اینگلو ہائی اسکول کے صدر مدرس شبیر احمد دفعدار اور انجمن بائز ہائی اسکول کے ہیڈماسٹر محی الدین ختال نے اپنے اپنے ہائی اسکولوں کے سالانہ رپورٹ کی خواندگی کی۔ انجمن حامئی مسلمین بھٹکل کے ایڈیشنل جنرل سکریٹری محمدا سحق شاہ بندری نے استقبالیہ و افتتاحی کلمات پیش کئے ۔ عبدالرشید مرزانی نے کلمات تشکر اداکئے۔ اس موقع پر سعودی عربیہ کے معروف بزنس مین اور ساحل آن لائن ڈائرکٹر جناب قمر سعدا، انجمن کے نائب صدر عبدالرحیم دامودی ، انجمن کے جنرل سکریٹری اسماعیل صدیق، ہائی اسکول بورڈ کے سکریٹری عبدالواجد کولا ودیگر بھی ڈائس پر موجود تھے۔

سالانہ جلسے کی مناسبت سے پیر کی صبح انعامی تقریب کا اہتمام کیا گیا تھا جس میں انجمن انجنئیرنگ کالج بھٹکل کے شعبہ ایم بی اے کے صدر پروفیسر ظہیر حسن کھروری مہمان خصوصی کے طور پر مدعو تھے ۔ جلسے میں ثقافتی مقابلہ جات اور کھیل مقابلے میں جیت حاصل کرنے والے طلبا ، این سی سی ، اسکاؤٹ روورس کیڈٹس کے درمیان انعامات تقسیم کئے گئے۔