بنٹوال میں جانور لے جانے والی لاری الٹ گئی۔۔۔ چار گائیں ہلاک
بنٹوال28؍اگست (ایس او نیوز)چار گائیں اس وقت ہلاک ہوگئیں جب جانوروں سے بھری ہوئی تیز رفتارلاری بے قابو ہوکر الٹ گئی۔یہ واقعہ بنٹوال تعلقہ کے کلّاڈکا میں امٹور کراس کے پاس اتوار کے دن صبح کے وقت پیش آیا۔
کہا جاتا ہے کہ لاری کے اندر جملہ 15جانور تھے جن میں سے چار گائیں موقع پر ہی ہلاک ہوگئیں۔حادثہ ہوتے ہی لاری کا ڈرائیور وہاں سے فرار ہوگیا۔ خیال کیا جاتا ہے کہ غیر قانونی طورپر جانورلے جانے کے چکر میں ٹرک بڑی تیز رفتاری سے چلایا جارہا تھاجس سے ایک موڑ پر لاری پر ڈرائیور کا کنٹرول ختم ہوگیا اور حادثہ واقع ہوگیا۔
پولیس نے موقع پر پہنچ کر لاری اور بقیہ جانوروں کو اپنے قبضے میں لے لیا ہے۔اور معاملہ درج کرنے کے بعد اس بات کی تحقیق کررہی ہے کہ یہ جانور کہاں سے لائے گئے تھے اور اس لاری میں اس وقت کون کون موجود تھا۔