بھٹکل 3/جون (ایس او نیوز) چار روز قبل نیترانی جزیرہ کے قریب ڈوبنے والی اینجل ون بوٹ کو جو لاوارث حالت میں اِدھر سے اُدھر تیر رہی تھی، اب  بھٹکل بندر  لاکر باندھ دیا گیا ہے۔ یہ بوٹ سمندری لہروں کی زد میں آکر نیترانی سے ہوتے ہوئے بھٹکل کے بیلکے تک پہنچ گئی تھی اور آگے کی طرف بڑھ رہی تھی۔

ماہی گیروں نے بتایا کہ کل سنیچر کو کوسٹل سیکوریٹی پولس کی بوٹ کی مدد سے اُسے کھینچ کر بھٹکل لانے کی کوشش کی گئی تھی، مگر کوشش ناکام ہوگئی تھی، جس کو دیکھتے ہوئے آج دو بوٹوں کاویا شری اور ویگنیشور کی  مدد سے اوندھی گری ہوئی بوٹ کو رسیوں کی مدد سے کھینچ کر بھٹکل بندر لایا گیا ہے اور اسے باندھ دیا گیا ہے۔

بندر کے کھاروی سماج اور منڈلی کے موگیر سماج سے تعلق رکھنے والے 25 سے زائد ماہی گیروں نے پہلے دو بوٹوں اور ایک کشتی کی مدد سے اوندھی گری ہوئی بوٹ کو بھٹکل بندر کی طرف کھینچ لایا، پھر لوگوں نے رسی باندھ کو کنارے کی طرف کھینچنا شروع کردیا۔ سمندری موجوں میں زیادہ  اُٹھان ہونے کی وجہ سے بوٹ کو کھینچ کر لانے میں  ماہی گیروں کو کافی  دشواری  اُٹھانی پڑی۔

خیال رہے کہ اس بوٹ پر موجود چھ میں سے چار ماہی گیروں کو  بچالیا گیا تھا، دو ماہی گیر سمندر میں غرق ہوکر لاپتہ ہوگئے تھے، اُن کی لاش ابھی بھی برآمد نہیں ہوئی ہے، سمجھا جارہا ہے کہ ان کی لاش سمندر کے درمیان پائے جانے والے چٹانوں میں پھنسے رہ سکتے ہیں۔