ٹیلی ویژن اور اخبارات دیکھنے والوں کا دماغ صحیح نہیں ہوتا۔ متنازع بیانات دینے والے اننت کمار ہیگڈے نے اب میڈیا والوں کو لیا آڑے ہاتھ
انکولہ 20؍فروری (ایس او نیوز) مرکزی وزیر اننت کمار ہیگڈے نے ایک بار پھر اپنی زبان درازی کا مظاہرہ کرتے ہوئے میڈیا پر نشانہ سادھا اور کہا کہ میڈیا والے جو بھی من چاہے وہ لکھ دیتے ہیں۔جو لوگ ٹی وی دیکھتے اور اخبارات پڑھتے ہیں، ان کا دماغ صحیح نہیں ہوتا۔
مرکزی وزیر اننت کمار نے انکولہ کے الگیری میں ایک مندر کے احاطے میں پارٹی کارکنان کے لئے منعقدہ پروگرام سے خطاب کرتے ہوئے ان خیالات کا اظہار کیا۔اور کہا کہ میڈیا والے ہماری حمایت میں نہیں لکھتے ، بلکہ جو ان کا من چاہتا ہے وہ لکھ دیتے ہیں۔آپ لوگ اس پر توجہ نہ دیں۔ میں نے گزشتہ دس برسوں سے ٹی وی دیکھنا اور اخبار پڑھنا چھوڑ دیا ہے، اسی لئے میرا دماغ درست ہے۔اگر آپ لوگوں کا بلڈ پریشر اور شوگر ٹھیک رہنا ہے تو ٹی وی مت دیکھنا اور اخبار مت پڑھنا۔
میڈیا کے ساتھ ہیگڈے کی ناراضی کی وجہ یہ بتائی جاتی ہے کہ جنوری میں روزگار میلہ کے دوران کاروار میں اخباری نمائندوں نے دوسری پارٹی کے اراکین اسمبلی کو خریدنے کے لئے بی جے پی کی طرف سے کیے جارہے ’آپریشن کنول‘ پر سوال پوچھا تھا۔ اس وقت مرکزی وزیر کے باڈی گارڈ ز نے اخباری نمائندوں کے ساتھ دست درازی کی۔کاروار کے رکن اسمبلی اور بی جے پی لیڈروں نے اخباری نمائندوں کا مذاق اڑایا۔جس سے ناراض ہوکر میڈیا والوں نے اننت کمار ہیگڈے کے پروگراموں کا بائیکاٹ کرنے کا فیصلہ کیا ۔اسی کے تحت چند دن پہلے جب انکولہ میں اننت کمارہیگڈے نے پاسپورٹ سینٹر کاافتتاح کیا تھا تو کسی بھی میڈیا والے نے ان سے کوئی سوال وجواب نہیں کیا اور کوئی ردعمل یا تاثر نہیں پوچھا۔اس سے بوکھلائے ہوئے اننت کمار ہیگڈے نے اب میڈیا کے خلاف اپنی بھڑاس نکالنا شروع کیا ہے۔
اننت کمار ہیگڈے نے مزید کہا کہ دیش کے کونے کونے میں سیاسی منظر نامہ بدل رہا ہے۔بی جے پی جیت درج کرکے حکومت بنانے والی ہے۔ کانگریس پارٹی نے تو صرف جھوٹ کا انبار لگانے کو ہی اپنا مقصد بنالیا ہے۔ان کا تعمیر کیا ہوا جھوٹ کا تاج محل زیادہ دن ٹھہرنے والا نہیں ہے۔اننت کمار نے پیش گوئی کرتے ہوئے کہا کہ آنے والے دنوں میں بی جے پی 300سے زیادہ سیٹیں جیتنے والی ہے اور نریندرا مودی دوبارہ وزیر اعظم بننے والے ہیں۔
الگیری میں مجوزہ ہوائی اڈے کی تعمیر کے سلسلے میں بات کرتے ہوئے اننت کمار نے کہا کہ عوامی املاک کو نقصان پہنچائے بغیر تعمیری کام انجام دینے کے لئے متعلقہ افسران کو ہدایت دی گئی ہے۔یہاں سے عوام کوزمینیں خالی کرکے کسی او ر مقام پر چلے جانے کی ضرورت پیش نہیں آئے گی۔ اس لئے عوام خوفزدہ نہ ہوں۔اس موقع پرالگیری گرام پنچایت کے صدر منجو ناتھ نائک کے علاوہ سریش نائیک الگیری، ایڈوکیٹ ناگراج نائیک، بی جے پی منڈل صدر نتیا نند نائیک، شیش گیری نائک، رائیپا نائک وغیرہ موجود تھے۔