منڈگوڈ:25؍مارچ (ایس او نیوز) جےڈی ایس نے دیش پانڈے کو کنارے لگاکر اُترکنڑا لوک سبھا کا ٹکٹ حاصل کیا ہے، جس کے بعد دیش پانڈے کی حالت نازک ہوگئی ہے ضلع میں چونکہ سیاست کی تصویر بدل رہی ہے، اس لئے بی جے پی کو ووٹ دینا  اب مجبوری بن گئی ہے۔ کانگریس والوں کی زبان پر بھی اب مودی کا نام ہے، ان باتوں کا اظہار اترکنڑا بی جے پی امیدوار  اننت کمار ہیگڈے نے  کیا۔

باتوں سے عوام کو اپنی طرف راغب کرنے میں ماہر مرکزی وزیر اننت کمار ہیگڈے نے تعلقہ کے ملگی دیہات میں کارکنان کی میٹنگ میں بات کرتے ہوئے کہاکہ یہ مقامی الیکشن نہیں ہے بلکہ ملک کی عزت و وقار کا الیکشن ہے، اس مرتبہ عوام اگر  ووٹ دیں گے تو وہ ایک تاریخی ووٹ ہوگا یہ سوچ کر عوام کو  رائے دہی کرنی چاہئے۔ ہیگڈے نے کہا کہ اترکنڑا ضلع میں بی جے پی کے خلاف امیدوار کھڑا کرنے کے لئے سبھی مخالف پارٹیاں سوچ میں پڑ گئی ہیں، ہیگڈے نے اپنے کارکنان پر زور دیا کہ وہ  اس بار  ریکارڈ ووٹنگ کرائیں۔

ہیگڈے نے کہا کہ اترکنڑا ضلع میں مخالف پارٹیوں کے امیدوار لوک سبھا انتخابات میں جیت حاصل کرنے کے لئے نہیں بلکہ پارٹی فنڈ لے کر گھر جانے کے لئے الیکشن لڑرہے ہیں۔ مزید کہا کہ نریندر مودی کی طرف سے کئے گئے کاموں کو عوام تک پہنچانے کا کام ہمیں کرنا ہے، لوک سبھا انتخابات کے بعد کرناٹکا کی مخلوط حکومت کے گرنے میں کوئی شک نہیں ہے، اس سے قبل مخالف پارٹیاں غریبی ہٹاؤ،ترقی جات کاموں کے متعلق بات کرتے تھے اب وہ سب بھول گئے ہیں۔

ہیگڈے کے مطابق جمہوریت کے استحکام کے لئے حزب مخالف ہونا چاہئے ، لیکن اترکنڑا ضلع میں جے ڈی ایس پارٹی نےبہت ہی منصوبہ بند طریقے سے کانگریس کو ختم کردیاہے۔ دیش پانڈے کی بڑی بے عزتی کی گئی ہے، اس انتخابات میں جے ڈی ایس نے دیش پانڈے کو کنارے لگا کر ٹکٹ حاصل کیا ہے۔ دیش پانڈے کی حالت تھوڑی نازک ہے، ضلع میں سیاست کی تصویر بدل رہی ہے، ہر ایک کے لئے اب بی جے پی مجبوری ہے، کانگریس والوں کی زبان پر بھی مودی کانام ہے، مستقبل میں یلاپور حلقہ سے بھی بی جے پی جیت حاصل کرنے کی بات کہی۔ سابق رکن اسمبلی وی ایس پاٹل نے بھی اپنے خیالات کااظہار کیا۔ اس موقع پر ضلع پنچایت ممبر ایل ٹی پاٹل، بی جے پی لیڈران سی پی پاٹل، اشوک چلوادی، کرشنا ایسلے، امیش بیجاپور، ناگ بھوشن، ہنومنتپا، مہیش وغیرہ موجود تھے۔