اقلیتی فلاح و بہبودی کے منصوبوں اور اسکیموں کے تعلق سے ذمہ داران کو آگاہ کرنے بھٹکل تنظیم میں منعقد ہوا اہم پروگرام
بھٹکل :25/جولائی (ایس اؤ نیوز) حکومتیں اقلیتوں کی ترقی ، فلاح وبہبودی کےلئے مختلف منصوبے اور اسکیمیں جاری کرتی ہیں، مگران منصوبوں اور اسکیموں کے متعلق صحیح جانکاری نہ ہونےکی وجہ سے عوام خاطرخواہ استفادہ نہیں کرپارہےہیں ، انہی وجوہات کی بنا پر عوام میں اقلیتی منصوبہ جات کے متعلق بیداری پیدا کرنےکے لئے آج یہاں کے قومی و سماجی دارہ مجلس اصلاح و تنظیم میں پروگرام منعقد کیا گیا ہے۔ عوام الناس کو چاہئے کہ وہ ان اسکیموں سے فائدہ اُٹھائیں ان باتوں کا اظہار بھٹکل اسسٹنٹ کمشنر ساجد ملا نے کیا۔
وہ یہاں بدھ کی صبح مجلس اصلاح وتنظیم بھٹکل اور محکمہ اقلیتی فلاح وبہبودی کے اشتراک سے تنظیم ہال میں منعقدہ سرکاری اسکیموں کے متعلق عوامی بیداری پروگرا م میں مہمان ِ خصوصی کی حیثیت سے خطاب کررہے تھے۔ اقلیتی محکمہ کے مختلف منصوبوں اور اسکیموں کے معلوماتی کتابچہ کا اجراء کرنے کے بعد ساجد ملا نےکہاکہ دیگر مقامات کے مقابلے میں بھٹکل کااقلیتی طبقہ تعلیم یافتہ ہے ، انہوں نے اقلیتوں پر زور دیا کہ وہ حکومتی منصوبہ جات سے استفادے کی طرف توجہ دے کر دیگر مقامات کے لئے بھی مثال بنے۔ انہوں نے پروگرام میں شریک مختلف سنٹروں اورجماعتوں کے ذمہ داران سے درخواست کی کہ وہ یہاں دی جانے والی جانکاری کو عوام تک پہنچائیں۔
تحصیلدار وی این باڈکر نے اس موقع پر اپنے خیالات کا اظہار کرتے ہوئے کہاکہ اقلیتی محکمہ کے جتنےبھی منصوبے اور اسکیمیں ہیں بھٹکل تعلقہ میں ان کے نتیجہ خیز نفاذ میں یہاں کے نوجوان اہم رول ادا کرسکتے ہیں۔ وہ متحرک و سرگرم ہوکر اس سلسلےمیں کام کریں تو عوام کوکافی فائدہ پہنچے گا۔انہوں نے بتایا کہ بھٹکل میں میٹرک کے بعد اعلیٰ تعلیم کے لئے اقلیتی طلبا کو ہاسٹل کی سہولت فراہم کرنے کے لئے قریب 9گنٹہ زمین منظور کی گئی ہے۔انہوں نے ہاسٹل کی تعمیر میں اقلیتی طبقہ کے نمائندوں سے تعاون کی اپیل کی۔
محکمہ اقلیتی فلاح و بہبودی کے تعلقہ آفیسر شمش الدین نے محکمہ کے منصوبوں اور اسکیموں کے متعلق جانکاری دیتے ہوئے استفادہ کی صورت میں ضوابط ، اصول ، شرائط وغیرہ پر تفصیل سے روشنی ڈالی۔ انہوں نے محکمہ کی طرف سے خاص کر اقلیتی طلبا کے وظائف ، بیرونی ممالک میں خصوصی تحقیقات ، ریسرچ وغیرہ کے لئے دی جانے والی سہولیات کی جانکاری دی۔ انہوں نے متعلقہ منصوبہ جات کے متعلق عوام کا بھرپور تعاون دینے ،انکی رہنمائی کے لئے ہمیشہ تیار رہنے کی بات کہتے ہوئے کہاکہ شہرمیں مولانا آزاد ماڈل اسکول کی تعمیر بھی زیر غور ہے۔انہوں نے زور دے کر کہاکہ ضلع کے کسی ایک مقام پر اردو بھون کی بھی تعمیر کا منصوبہ ہے اگر بھٹکل کے مسلمان اس سلسلے میں کوشش کریں تو کافی فائدہ ہوگا۔
تنظیم کے نائب صدر عنایت اللہ شاہ بندری نے پروگرام کی صدارت کی۔ تنظیم کے جنرل سکریٹری محی الدین الطاف کھروری نے استقبال کرتے ہوئے افتتاحی کلمات پیش کئے ۔ سکریٹری مولانا سید یاسربرماور ندوی نے نظامت کے فرائض انجام دئیے ۔ ڈائس پر بلاک ایجوکیشن آفسر ایم آر منجی، تنظیم کے ذمہ داران فاروق شاہ بندری ، جعفر محتشم، بلدیہ صدر محمد صادق مٹا، جالی گرام پنچایت صدر آدم پنمبور وغیرہ موجود تھے۔ بھٹکل کے ساتھ ساتھ، مرڈیشور، منکی و شراوتی بیلٹ کے کافی ذمہ داران پروگرام میں شریک تھے۔ دوردراز کے مقامات سے آنے والوں کے لئے تنظیم کی جانب سے دوپہر کی ضیافت کا بہترین انتظام کیا گیا تھا۔
محکمہ اقلیتی فلاح و بہبودی کے تعلقہ آفسر شمس الدین نے اقلیتوں کے لئے جاری منصوبوں کے متعلق جو جانکاری دی، اُس کی وڈیو ریکارڈنگ ذیل میں پیش کی جارہی ہے: