ایمنسٹی انٹرنیشنل کے جلسہ میں مخالف ہند نعرے بازی اور یڈ یورپا کی راج ناتھ سنگھ سے شکایت
بنگلورو24 اگست(ایس او نیوز) ریاستی بی جے پی کے صدر بی ایس یڈ یورپا نے یہاں حال ہی میں منعقدہ جلسہ میں مخالف ہند نعرے بازی کرنے والے افراد کی پشت پناہی کے لیے سدارامیا حکومت کو مورد الزام ٹہرایا اور کہا کہ انہوں نے مرکزی وزیرداخلہ راج ناتھ سنگھ کے علم میں یہ بات لائی ہے۔شہر کے ٹاؤن ہال میں احتجاجی جلسہ میں بی جے پی اور اے بی وی پی کے کارکنوں سے خطاب کرتے ہوئے یڈ یورپا نے کہا کہ انہوں نے نئی دہلی میں ریاستی بی جے پی کور کمیٹی کی میٹنگ کے بعد مسٹر سنگھ سے بات کی ہے۔ انہوں نے مسٹر سنگھ پرزور دیا کہ وہ اس حرکت پر ریاستی حکومت کو انتباہ دیں۔ایمنسٹی انٹرنیشنل انڈیا کی جانب سے منعقدہ جلسہ میں تین افراد کی جانب سے مخالف ہند و مخالف فوج نعرے بازی کرنے کا حوالہ دیتے ہوئے یڈ یورپا نے کہا ''یہ ناقابل معافی گناہ ان تینوں نے کیا ہے اور حکومت کو چاہئے کہ وہ فوری طور پر ان کو گرفتار کرے۔اگرچہ کہ ان تمام کے خلاف ایف آئی آر درج کی گئی ہے، لیکن تاحال کوئی بھی کارروائی نہیں کی گئی ہے ''۔ ایمسنٹی انٹرنیشنل انڈیا کے دفتر پر حال ہی میں احتجاج کرنے والے اے بی وی پی کے کارکنوں اور طلبہ پر لاٹھی چارج کے احکام دینے والے پولیس ملازمین کے خلاف کاروائی کا مطالبہ کرتے ہوئے یڈیورپا نے کہا کہ ان کے مطالبہ کی تکمیل تک احتجاج جاری رہے گا اور ریاستی حکومت کو چاہئے کہ وہ مناسب اقدامات کرے، تاکہ ایسے واقعات کا اعادہ نہ ہوسکے۔بی جے پی جو اس مسئلہ پر اے بی وی پی کی حمایت کر رہی ہے، نے اس سلسلہ میں ریاست گیر احتجاج کی شروعات کی ہے۔