مودی کے پاس وزیراعلیٰ کی خفیہ دستاویز،تیجسوی یادوملزم توجے شاہ بے قصورکیوں؟
نیتش کمار نے اپنی شناخت کھو چکے ہیں تابڑ توڑ تیل مالش کر وا رہے ہیں : لالو پرساد یادو
پٹنہ،19؍اکتوبر(ایس او نیوز؍آئی این ایس انڈیا) راشٹریہ جنتاڈل کے قومی صدر لالو یادو نے اعلان کیا ہے کہ وہ پٹنہ میں ایک اور ریلی کریں گے ۔ تاہم لالو پرساد کا یہ بھی کہنا ہے کہ اس کی تاریخ ابھی متعین نہیں کی جاسکتی ۔ صحافی سے گفتگو کرتے ہوئے لالوپرساد نے کہا کہ نوٹ بندی سے ملک میں بے روزگاری بڑھ گئی ہے اور اسی مشکل حالت میں جی ایس ٹی کو بھی نافذ کر دیا گیا ہے ۔ لالو یادو نے اپنے قدیم لب و لہجہ میں نتیش کمار پر نشانہ لگاتے ہوئے کہا کہ نتیش اپنی سیاسی شناخت کھو چکے ہیں اور تابڑ توڑ تیل مالش کر وا رہے ہیں ۔لالو کہتے ہیں کہ بار بار کے مطالبہ کے بعد بھی پی ایم نے پٹنہ یونیورسٹی کو مرکزی یونیورسٹی کی حیثیت دینے کی مانگ کو مسترد کر دیا ہے، ایسا لگتا ہے کہ پی ایم کے پاس کوئی ’’خفیہ دستاویز‘‘ ہے جس پر نیتش کو اب ترجیح نہیں دی جا رہی ہے ۔ رابرٹ وڈرا کے معاملے پر لالو پرساد کہتے ہیں کہ یہ جے شاہ کے قضیہ سے توجہ ہٹانے کی کوشش ہے ۔ انہوں نے پوچھا کہ اگرتیجسوی یادو امیت شاہ کے لفظوں کے مطابق قصور وار ہوسکتے ہیں تو جے شاہ کس طرح معصوم ہوسکتے ہیں۔ ایودھیا مسئلہ پر ڈرامہ کرنے کا بی جے پی پر الزام لگاتے ہوئے لالو نے کہا کہ یہ سب گجرات اور ہماچل پردیش انتخابات کو ملحوظ رکھتے ہوئے کیا جا رہا ہے بی جے پی گنہ گاروں کی جماعت ہے جسے بھگوان رام معاف نہیں کریں گے۔