ریاستی کانگریس لیڈروں کو نصیحت کرنے راہل گاندھی سے درخواست بہتر انتظامیہ کو یقینی بنانے دونوں پارٹیوں کے درمیان تال میل ضروری: ایچ ڈی کمار سوامی
بنگلورو، 19؍ جون (ایس او نیوز) ریاستی وزیراعلیٰ ایچ ڈی کمار سوامی نے آج دہلی میں کانگریس صدر راہل گاندھی سے ملاقات کر کے ریاست کی سیاسی صورتحال سے متعلق تبادلہ خیال کیا۔ ا س ملاقات کے دوران راہل گاندھی نے کمار سوامی کو مشورہ دیا کہ کرناٹک میں کانگریس جے ڈی ایس مخلوط حکومت کا یہ ابتدائی دور ہے۔ ابتدا میں حکومت کو کسی الجھن میں مبتلا ہونے نہ دیا جائے۔ دوستانہ ماحول میں انتظامیہ چلایا جائے۔ ایک بہتر انتظامیہ فراہم کرنے کے مقصد کے تحت حکومت چلائی جائے۔ دریں اثنا کمار سوامی نے راہل گاندھی کو آگاہ کیا کہ ریاستی کانگریس لیڈروں کے درمیان اختلافات پائے جاتے ہیں۔ریاستی کانگریس اراکین ریاستی کابینہ میں جگہ حاصل کرنے کے لیے مختلف سطحوں پر لابی چلا رہے ہیں جس سے حکومت پر اثر پڑ رہا ہے۔ انہوں نے یہ بھی بتایا کہ مخلوط حکومت نے اب کام کا آغاز کیا ہے۔ ابتدا ہی میں کانگریس لیڈروں کے آپسی اختلافات کا اثر حکومت پر پڑنے لگا ہے۔کسی بھی طرح ریاستی کانگریس لیڈروں کو طلب کر کے انہیں نصیحت کرنے اور ایک مستحکم حکومت کو یقینی بنانے میں تعاون کرنے کی ہدایت دینے کی انہوں نے درخواست کی ہے۔مخلوط حکومت کا نیابجٹ پیش کرنے سے متعلق سابق وزیر اعلیٰ سدارامیا کے اعتراض کرنے کا معاملہ بھی کمارسوامی نے راہل گاندھی کے علم میں لایا اور کہا کہ نئی سرکار قائم ہونے کے بعد نیا بجٹ پیش کرنا بھی ضروری ہے۔ اس پر اعتراض کرتے ہوئے سدارامیا کہہ رہے ہیں کہ نیابجٹ پیش کرنے کی ضرورت نہیں ۔ انہوں نے راہل گاندھی سے یہ بھی کہا ہے کہ دونوں پارٹیوں کے انتخابی منشور میں کئے گئے وعدوں پر مشتمل نیا ریاستی بجٹ پیش کرنے کی اشد ضرورت ہے۔ کمار سوامی نے راہل گاندھی سے کہا ہے کہ مخلوط حکومت کی کو آرڈنیشن کمیٹی میں کئے گئے فیصلے کے تحت پچھلی حکومت کے عوام پرور اسکیموں کو جاری رکھا جائے گا۔ اس کے علاوہ نیا بجٹ پیش کرنے میں کوئی رکاوٹ پیدا نہ کرنے ریاستی لیڈروں کو ہدایت دینے کی انہوں نے درخواست کی ہے۔ انہوں نے یہ بھی کہا کہ کابینہ کی توسیع ہوئے دو ہفتے گزر چکے ہیں لیکن اب بھی کابینہ میں شمولیت سے محروم کانگریس لیڈران بار بار حکومت کو گرانے کی دھمکیاں دے رہے ہیں جس سے حکومت کے کام کاج پر اثر پڑ رہا ہے۔مخلوط حکومت کو آزادی سے اپنا کام کاج کرنے کی راہ ہموار بنانے کی بھی انہوں نے راہل سے درخواست کی ہے۔ اس کے علاوہ سرکاری بورڈس اور کارپوریشنوں کے لئے نامزدگیوں میں تعاون کرنے اور ہر معاملے میں دونوں پارٹیوں کے تال میل سے حل کرنے کی ہدایت دینے کے لئے بھی کہا۔اس کے بعد نامہ نگاروں سے بات کرتے ہوئے کمار سوامی نے کہا کہ راہل گاندھی سے ان کی ملاقات خیر سگالی ملاقات تھی۔اس ملاقات کے دوران بورڈس اور کارپوریشنوں کے لئے نامزدگیوں سے متعلق تبادلہ خیال کیا گیا۔ اس کے علاوہ کابینہ کی اگلی توسیع سے متعلق بھی بات چیت ہوئی۔اس موقع پر نامہ نگاروں کے کئے گئے کسی بھی سوال کا انہوں نے جواب نہیں دیا۔ لیکن انہوں نے کہا کہ کرناٹک میں مخلوط حکومت مستحکم ہے۔اگلی کابینہ کی توسیع کی کمار سوامی نے تفصیلات نہیں بتائیں۔ کابینہ میں توسیع سے متعلق ریاستی کانگریس لیڈروں کے درمیان پائے جانے والے اختلافات پر کمار سوامی نے گفتگو کرنے سے انکار کیا۔اس موقع پرجے ڈی ایس کے قومی جنرل سکریٹری دانش علی اور اے آئی سی سی کے جنرل سکریٹری اور کرناٹک میں کانگریس امور کے انچارج کے سی وینوگوپال بھی موجود رہے۔