امبیڈکر تعلیم کو کافی اہمیت دیتے تھے:پرنب
بنگلور:14/اپریل (ایس او نیوز) صدر پرنب مکھرجی نے آج کہا کہ بابا صاحب ڈاکٹر بھیم راو امبیڈکر تعلیم کو بہت اہمیت دیتے تھے اور ان کا ماننا تھا کہ تعلیم کے ذریعے لوگوں کی قسمت بدلی جاسکتی ہے۔مسٹر مکھرجی نے یہاں بنگلور امبیڈکر اسکول آف اکنامکس کا سنگ بنیاد رکھنے کے بعد کہا کہ ڈاکٹر امبیڈکر کے مطابق تعلیم کسی شخص کی قسمت بدلنے کا ذریعہ ہوسکتی ہے و ہ تعلیم کو کافی اہمیت دیتے تھے۔اس موقع پر انہوں نے اس ادارہ سے وابستہ لوگوں اور حکومت سے کہا کہ وہ یقینی بنائیں کہ بابا صاحب کے نام پر تعمیر یہ ادارہ ان کے عظیم آدرشوں پر عمل کرے۔انہوں نے کہا کہ ڈاکٹر امبیڈکر نے دنیا کے مختلف آئین سے تحریک لے کر ایک ایسا آئین بنایا، جس کی روح پوری طرح ہندوستانی تھی۔ انہوں نے بابا صاحب کو ایک عظیم شخصیت بتاتے ہوئے کہا کہ لندن اسکول آف اکنامکس کے ایک ہونہار طالب علم ڈاکٹر امبیڈکر نے نہ صرف ہمیں ایک عظیم آئین دیا،بلکہ وہ غریبوں او رمحروم افراد کے لئے بھی کام کرتے رہے۔