امبریش کے معاملے پر تبصرے سے سدرامیا کا انکار
بنگلورو،23؍اپریل(ایس او نیوز) منڈیا اسمبلی حلقے سے کانگریس امیدوار کے طور پر میدان میں اترنے میں سابق وزیر اور اس حلقے کے موجودہ رکن اسمبلی امبریش کے تذبذب پر تبصرہ کرنے سے وزیراعلیٰ سدرامیا نے انکار کردیا ہے۔آج میسور میں اخباری نمائندوں سے بات چیت کرتے ہوئے سدرامیا نے کہاکہ امبریش کو پارٹی نے باضابطہ ٹکٹ دے دیا ہے۔ اس کے باوجود بھی اگر وہ انتخابی میدان سے دور ہی رہنا چاہیں تو یہ ان پر منحصر ہے۔ انہوں نے کہاکہ اگر امبریش جلد واضح کردیں کہ وہ انتخاب نہیں لڑیں گے تو اعلیٰ کمان کی طرف سے کسی اور کو امیدوار بناکر میدان میں اتارا جائے گا۔ سدرامیا نے کہا کہ وہ خود اعلیٰ کمان کی ہدایت کے مطابق ریاست کے کسی بھی کونے میں بطور امیدوار انتخاب لڑنے تیار ہیں۔