بنگلورو:23/مارچ(ایس او نیوز) وزیر صحت رمیش کمار نے آج ریاستی اسمبلی کو بتایا کہ ریاست کے تمام تعلقہ جات میں اگلے تین ماہ کے دوران ڈیالیسس سنٹرس قائم کردئے جائیں گے۔وقفہئ سوالات میں جنتادل (ایس) کے کونا ریڈی کے سوال کا جواب دیتے ہوئے انہوں نے کہاکہ نجی اور عوامی اشتراک سے یہ ڈیالیسس سنٹرس قائم کئے جارہے ہیں، اس کیلئے ٹنڈرس طلب کئے جاچکے ہیں اور تین ماہ کی مدت میں حکومت اس پراجکٹ کو مکمل کرنے کی پابند ہے۔ انہوں نے کہاکہ نجی اور عوامی اشتراک سے محکمہ میں آنے والے 20 ضلع اسپتالوں اور تین جنرل اسپتالوں اور تمام تعلقہ مراکز میں یہ ڈیالیسس سنٹرس قائم کئے جائیں گے۔ ٹنڈر کے ذریعہ جن کا بھی انتخاب کیا جائے گا حکومت ان سے باضابطہ معاہدہ کرے گی۔ انہوں نے کہا کہ ان مراکز کیلئے محکمہئ صحت کے پاس فنڈ دستیاب ہے، اور ساتھ ہی بعض تعلقہ جات میں مراکز کھولنے کیلئے کام بھی آگے بڑھایا جاچکا ہے۔اسی مقصد کے تحت حکومت نے نجی اداروں کے ساتھ اشتراک کیا ہے۔ انہوں نے کہاکہ پچھلے تین سال کے دوران ہر ضلع اور ہر تعلق اسپتال میں دو ڈیالیسس سنٹرس قائم کرنے کی پہل کی گئی تھی۔آئندہ ہر ڈیالیسس سنٹر میں ڈیالیسس کی تین مشینیں مہیا کرائی جائیں گی۔ 2017-18 کے دوران 114 تعلقہ جات میں آنے والے پرائمری ہیلتھ سنٹروں میں ڈیالیسس مراکز قائم کرکے ضروری مشینیں مہیا کرادی جائیں گی۔ انہوں نے کہاکہ منگلور کے وینلاک اسپتال کو بنگلور کی اندرا گاندھی چلڈرنس اسپتال کے طرز پر ترقی دی جائے گی اور اسے صحت اطفال کا علاقائی مرکز بنایا جائے گا۔ اس مقصد کیلئے 2017-18کے بجٹ میں تین کروڑ روپے مہیا کرائے گئے ہیں۔ اس اسپتال کو بہتر بنانے کیلئے انہوں نے خود اس کا معائنہ کیا ہے۔ انہوں نے کہاکہ ریاست بھر میں ہر 30 ہزار کی آبادی کیلئے ایک پرائمری ہیلتھ سنٹر قائم کرنے کی ریاستی حکومت پابند ہے۔ وقفہئ سوالات میں بی ایس آر کانگریس کے پی راجو کے سوال کا جواب دیتے ہوئے انہوں نے کہا کہ آل انڈیا میڈیکل کونسل کے ضوابط کے مطابق ہر 30ہزار کی آبادی کیلئے ایک پرائمری ہیلتھ سنٹر ضروری ہے۔ جہاں ضرورت پڑے وہاں 20 ہزار کی آبادی کیلئے بھی پرائمری ہیلتھ سنٹر قائم کیا جاسکتاہے۔انتہائی پسماندہ علاقوں میں موبائل کلینک قائم کئے جائیں گے، جس میں ایک ڈاکٹر، ایک نرس، ایک فار میسٹ اور ایک معاون متعین رہیں گے۔ انہوں نے کہاکہ حکومت نے پہلے ہی طے کیاہے کہ ریاست میں ہر پندرہ کلومیٹر کی مسافت پر ایک ایمبولنس تعینات کی جائے گی اور جان بچانے کیلئے ہر ایمبولنس میں ضروری عملہ ہمہ وقت متعین رہے گا۔