مہادائی مسئلے پر عنقریب کل جماعتی اجلاس: کمار سوامی
بنگلورو،15؍ستمبر(ایس او نیوز) وزیر اعلیٰ ایچ ڈی کمار سوامی نے کہا ہے کہ مہادائی ٹریبونل کے قطعی فیصلے کی روشنی میں ریاستی حکومت کو جو موقف اپنا نا ہے اس پر تبادلۂ خیال کے لئے عنقریب کل جماعتی اجلاس طلب کیا جائے گا۔
اخباری نمائندوں سے بات چیت کرتے ہوئے انہوں نے کہاکہ مہادائی فیصلے کے سلسلے میں انہوں نے ماہرین قانون اور محکمۂ آبی وسائل کے اعلیٰ افسروں کی میٹنگ کی ہے اس میں مہادائی ٹریبونل کے فیصلے کا تمام پہلوؤں کاجائزہ لیا گیا۔ اور ریاستی حکومت کی طرف سے اس سلسلے میں مستقبل کا لائحہ عمل کیا ہو اس پر بھی تفصیلی بات چیت کی گئی ۔ ریاست میں سیلاب ، بارش ، اور زمین کھسکنے کے واقعات کے متاثر علاقوں کا دورہ کرنے والی مرکزی ٹیم کے افسروں سے ملاقات کے بعد وزیراعلیٰ نے کہاکہ افسروں سے گز ارش کی گئی ہے کہ یہ یقینی بنایا جائے کہ سیلاب زدہ علاقوں کی زیادہ سے زیادہ امداد متاثرین تک پہنچے۔
وزیر اعلیٰ نے کہاکہ مرکزی وزیر داخلہ راج ناتھ سنگھ 18ستمبر کو بنگلور آرہے ہیں۔ ان کے اس دورے کا مقصد یہ ہے کہ بنگلور میں جنوبی ہند کے وزرائے اعلیٰ کی کانفرنس منعقد ہورہی ہے، ان کی آمد کا فائدہ اٹھاتے ہوئے ایک بار پھر ریاستی حکومت کی طرف سے گزارش کی جائے گی کہ سیلاب سے متاثرہ علاقوں کو مرکزی حکومت زیادہ سے زیادہ رقم مہیا کرائے تاکہ راحت کاری کے کاموں کو تیزی سے انجام تک پہنچایا جاسکے۔