ہمارا سارا لین دین قانون کے دائرہ میں : ڈی کے سریش
بنگلورو:4/ اگست(ایس او نیوز) ریاستی وزیر توانائی ڈی کے شیوکمار کے بھائی ڈی کے سریش نے کہاکہ ان کے ٹھکانوں پر محکمۂ انکم ٹیکس کے چھاپوں کی کارروائی بہت پہلے ہی مکمل ہوچکی ہے ،اس کے باوجود بھی افسران غیر ضروری تاخیر اور ٹال مٹول سے کام لے رہے ہیں۔ ایک اخباری کانفرنس سے خطاب کرتے ہوئے انہوں نے کہاکہ ان کے خاندان کے سبھی معاملات اور لین دین قانون کے دائرہ میں ہیں افسران کی طرف سے جو بھی دستاویزات طلب کئے گئے وہ تمام مہیا کرائے جاچکے ہیں ، ان دستاویزات کا جائزہ لینے میں افسران غیر ضروری طور پر سستی سے کام لے رہے ہیں۔ انہوں نے کہاکہ گجرات کے اراکین اسمبلی کے کرناٹک میں قیام کے بعد ہی انکم ٹیکس افسران کو خیال آیا کہ شیوکمار کے ٹھکانوں پر چھاپے مارنے کی ضرورت ہے۔ انہوں نے کہاکہ گجرات کے اراکین اسمبلی شیوکمار کی رہائش گاہ اور دیگر مقامات پر چھاپوں کی وجہ سے پریشان ضرور ہوئے، لیکن وہ تمام کے تمام متحد ہیں۔