آل انڈیا علماء ومشائخ بورڈ نے ''ریلی فار ریور'' مہم کی حمایت کی
نئی دہلی ،22؍ستمبر(ایس او نیوز؍آئی این ایس انڈیا) آل انڈیا علماء ومشائخ بورڈ نے عشاء فاؤنڈیشن کی طرف سے دریاؤں کو بچانے اور صاف رکھنے کے لئے چلائی جا رہی بیداری مہم ''ریلی فار ریور'' کی حمایت کی ہے۔بورڈ نے بیان جاری کر کہا ہے کہ دریاؤں کا تحفظ انسانی زندگی کے لئے انتہائی ضروری ہے اگر پانی اسی طرح آلودہ ہوتا رہا اورندیاں اسی طرح سوکھتی رہیں تو انسانی زندگی مشکل ہو جائے گی۔ بورڈ کے قومی جوائنٹ سیکرٹری حاجی سید سلمان چشتی نے کہا کہ اسلام نے آج سے تقریبا 1500 سال پہلے پانی کے تحفظ کے لئے ہدایت دی۔ اللہ کے رسول حضرت محمدﷺ نے فرمایا کہ دریاؤں میں پیشاب ۔پاخانہ نہ کیاجائے اور ان میں گندگی نہ پھیلائی جائے۔ پانی کو محفوظ کیا جائے اور اس کو آلودہ ہونے سے بچایا جائے۔ خودقرآن میں پانی کو لے کر کئی باتیں کہی گئیں ہیں اور پانی کو خدا کا تحفہ بتایا گیا ہے۔
انہوں نے جنگ کربلا کا بیان کرتے ہوئے کہا کہ حضرت امام حسین اور ان کی پیاس کا ذکر تو سب کررہے ہیں آئیے ہم سب امام حسین رضی اللہ عنہ کے نام پر مل دریاؤں کو آلودگی سے بچانے کا کام کریں اوران کو نئی زندگی دینے کے لئے آگے آئیں تاکہ امام حسین نے جس طرح ظلم کے خلاف اپنا سب کچھ لٹا کر فتح حاصل کی۔ ہم بھی انسانیت کے خلاف اس ظلم کو روکنے کے لئے آگے آئیں اور دریاؤں کے تحفظ کے اس تحریک کی حمایت کریں۔ یہاں ہمیں بس دریاؤں کو آلودگی سے بچانا ہے یہی ہمارا فرض ہے اور کربلا فرض سے نہ ڈگنے کا سبق ہے۔