علیم الدین این ایس یو آئی کے صوبائی نائب صدر مقرر
نئی دہلی:16/اگست(ایس او نیوز /آئی این ایس انڈیا)جے این یو میں این ایس یو آئی(کانگریس کی طلبہ ونگ) کے مختلف عہدوں پر ہونے والے انتخاب میں علیم الدین نے کامیابی حاصل کی ہے ۔ یونیورسٹی کو ایک ریاست کادرجہ حاصل ہونے کی وجہ سے علیم الدین کو صوبائی نائب صدرکا مقام ملا ہے ۔ واضح رہے کہ طلبا کے درمیان کے یہ عمومی انتخاب نہیں ہوتاہے ، بلکہ منتخب طلبا باضابطہ الیکشن سسٹم سے پارٹی کے دیگر عہدے داروں کا انتخاب کرتے ہیں۔اس عہد ہ پر کامیاب ہونے سے قبل علیم الدین صوبائی جنرل سکریٹری بھی رہ چکے ہیں ۔ ان کی فعالیت کو دیکھتے ہوئے اس سال انھیں نائب صدر منتخب کیا گیا ۔ اس موقع پر علیم الدین نے کہاکہ دیگر طلبا تنظیموں کی طرح فقط یونیورسٹیوں میں کامیابی ہمار امقصد نہیں ہے ، بلکہ طلبا کے حقوق کی لڑائی ہم وہاں بھی لڑتے ہیں ، جہاں طلبا ونگ کا الیکشن نہیں ہوتا ہے ۔ انھوں نے کہا کہ این ایس یو آئی دنیا کی سب سے بڑی جمہوری طلبا تنظیم ہے اور اس تنظیم نے ملک گیر سطح پر ہمیشہ طلبا کے حقوق کی بحالی کے لیے لڑائی لڑی ہے ۔ انھوں نے کہا کہ این ایس یو آئی کے جذبے ولگن کو دیکھتے ہوئے جے این یو میں طلبا کا رجحان اس تنظیم کی طرف بڑھ رہاہے۔جیت کے جشن میں این ایس یو آئی کے قومی صدر فیروز خان نے شرکت کرتے علیم الدین کو مبارکباد دی اور کئی نئی ذمہ داریاں بھی سونپیں۔