الجیئرز،11اپریل (یو این آئی) الجیریا کا ایک فوجی طیارہ دارالحکومت الجیئرز کے قریب آج حادثہ کا شکار ہوگیا جس سے اس پر سوار 250سے زیادہ افراد ہلاک ہوگئے ۔ ہلاک شدگان میں مغربی سہارا کے پولی ساریو تحریک آزادی کے ارکان بھی شامل ہیں۔ مقامی ذرائع ابلاغ کی اطلاعات کے مطابق الجیئرز کے جنوب مغرب میں واقع ہوائی اڈے کے پاس یہ حادثہ ہوا۔ ٹیلی فوٹیج میں جائے حادثہ پر دھنوئیں اور طیارے کے جلتے ہوئے ملبے کے چاروں طرف لوگوں کی بھیڑ نظر آئی۔ جائے حادثہ پر راحت کام شروع ہوگیا ہے ۔یہ طیارہ روسی ساخت کا تھا۔ مقامی میڈیاکے مطابق حادثہ میں257مسافر ہلاک ہوئے ہیں۔ الجیریا کی برسراقتدار ایف ایل این پارٹی کے ایک رکن نے ایک نجی ٹی وی چینل انہار کو بتایا کہ مہلوکین میں پولی ساریو کے 26ارکان شامل ہیں۔ یہ گروپ جسے الجیریا کی حمایت حاصل ہے ۔ پڑوسی مغربی سہارا کی آزادی کے لیے برسرپیکار ہے ۔ واضح رہے کہ مغربی سہارا کے اس علاقے پر مراقش بھی عرصے دعویٰ پیش کرتا رہا ہے ۔ اطلاع کے مطابق یہ فوجی طیارہ مغربی سہارا اور الجیریا کی سرحد پر واقع تندوف کی طرف جارہا تھا لیکن اڑان بھرتے ہی ہوائی اڈے کی حدود کے قریب ہی حادثہ کا شکار ہوگیا۔یہ اطلاع فوجی ذرائع نے دی۔تندوف میں مغربی سہارا سے آئے ہوئے ہزاروں پناہ گزین مقیم ہیں جن میں سے بہت سے پولی ساریو کے حامی ہیں۔