اتحادی فوج کی بمباری سے حوثی فیلڈ کمانڈر ہلاک
صنعاء ،18؍اپریل (ایس او نیوز؍آئی این ایس انڈیا )یمن کی شمالی گورنری صعدہ میں عرب اتحادی فوج کے ایک فضائی حملے میں ایران نواز حوثی باغیوں کا ایک اہم فیلڈ کمانڈر ہلاک اور متعدد جنگجو زخمی ہو گئے۔یمن کی مسلح افواج کی طرف سے جاری کردہ ایک بیان میں کہا گیا ہیکہ صعدہ گورنری میں منگل کے روز اتحادی فوج کے فضائی حملے میں حوثی کمانڈر ناصر القوبری اور اس کے متعدد ساتھی ہلاک ہو گئے۔ذرائع کے مطابق صعدہ گورنری کو حوثی باغیوں کا گڑھ سمجھا جاتا ہے۔ حالیہ ایام میں اس گورنری میں بڑی تعداد میں حوثی باغی ہلاک اور زخمی ہوئے ہیں۔ اس کے علاوہ اس علاقے میں کی جانے والی کارروائیوں میں لبنانی حزب اللہ اور ایرانی فوج کے عسکری ماہرین بھی مارے گئے۔ یمنی فوج نے صعدہ کو باغیوں سے چھڑانے کے لیے پانچ اطراف سے ’سانپ کا سر کاٹنا‘ کے عنوان سے آپریشن شروع کر رکھا ہے۔اطلاعات کے مطابق حوثی باغیوں نے صعدہ میں ساقین ڈاریکٹوریٹ میں لڑائی کے دوران ہلاک ہونے والے 20 جنگجوؤں کو دفن کیا ہے۔ یمنی فوج کا کہنا ہے کہ ساقین کے فوط قصبے میں بیس حوثی باغیوں کی لاشیں ایک ساتھ دفن کی گئیں۔