لکھنؤاحمدآباد ،10؍دسمبر (آئی این ایس انڈیا ) سماجوادی پارٹی کے سربراہ اکھلیش یادو نے کہا ہے کہ نوٹ بندی اور جی ایس ٹی کی وجہ سے تاجروں پر کافی برا اثر پڑا ہے۔ انہوں نے کہا کہ کسان مخالف اور تاجر مخالف پالیسیوں کی وجہ سے بی جے پی کا گراف نیچے آتا جا رہا ہے۔ بھارت کی معیشت مسلسل نیچے گرتی جا رہی ہے اور ملک کا تاجر طبقہ پریشان ہے۔ اکھلیش نے دعوی کیا کہ بی جے پی کو نوٹ بندی اور جی ایس ٹی کا واضح اثر گجرات انتخابات کے نتائج میں نظر آئے گا اور اس کا نتیجہ بھی بھگتنا پڑے گا۔ انہوں نے کہا کہ گجرات کے عوام نے بی جے پی کے خلاف اپنا ذہن بنا لیا ہے۔ جو کہ خوش آئند بات ہے ۔ اکھلیش یادو نے یو پی میں حالیہ بلدیاتی انتخابات کے نتائج کے بارے میں کہا کہ بی جے پی نے چھوٹے شہروں اور دیہی علاقوں میں اچھی کارکردگی نہیں دکھائی ، انہوں نے کہا کہ اگر میونسپل انتخابات میں بی جے پی کی جیت کو پیمانہ بنایا جا رہا ہے، تو بی جے پی کے چھوٹے شہروں اور دیہی علاقوں کی کارکردگی کا بھی اندازہ کرنا چاہئے۔ اکھلیش یادو نے واضح طور پر کہا کہ بی جے پی کو جھوٹی مسرتوں پر فخر کرنے کی ضرورت نہیں ہے ۔ اکھلیش یادو نے پارٹی ہیڈ کوارٹر میں تاجروں کے ایک اجلاس سے خطاب کرتے ہوئے الزام لگایا کہ یوپی میں قانون و انتظام کی حالت مسلسل بگڑ رہی ہے۔ جو کہ بیحد تشویشناک امر ہے ۔ انہوں نے متھرا اور سیتاپور کے واقعہ کا حوالہ کر کہا کہ ریاست میں تو بر سرا قتدار طبقہ یہ امن و امان کی صورتحال بہتر بنائے جانے کا سوانگ رچاتے ہیں ؛ لیکن حقیقت حال کچھ اور ہے ۔ انہوں نے یقین دلایا کہ سماجوادی پارٹی ہمیشہ تاجروں کے ساتھ ان کے مفادات کی شانہ بشانہ کھڑی رہے گی۔اس سے پہلے تاجر کانفرنس سے خطاب کرتے ہوئے ایس پی لیڈر رام گوپال یادو نے کہا کہ بی جے پی کی مرکزی اور ریاستی حکومت کی اقتصادی پالیسیوں کا نتیجہ ہے کہ تاجر اور کاروباری ملک چھوڑ کر جا رہے ہیں ۔ لیکن ریاستی وزیر اعلی بیرون ملک کے صنعت کاروں کو ریاست میں آنے کی دعوت دے رہے ہیں جو کہ ایک واضح نفاق ہے ۔ گجرات انتخابات پر رام گوپال نے دعوی کیا کہ بی جے پی وہاں ذلت آمیز شکست کا ذائقہ چکھنے جا رہی ہے ۔