نئی دہلی :16/دسمبر (ایس او نیوز/آئی این ایس انڈیا) کانگریس لیڈر ملک ارجن کھڑگے کی قیادت والی پارلیمنٹ کی پبلک اکاؤنٹس کمیٹی (PAC) نے اپنی رپورٹ میں کہا ہے کہ ملک کی فضائیہ کے پاس کافی تعداد میں لائٹ کامبیٹ ایر کرافٹ نہیں ہیں۔ کمیٹی نے اپنی رپورٹ میں ایل اے سی جن ’’تیجس‘‘ جیسے طیارے ہیں، کی کم تعداد کو لے کر اپنی تشویش ظاہر کرتے ہوئے ا س کو ملکی سلامتی کے لئے بڑا خطرہ قرار دیا ہے۔ واضح ہو کہ پارلیمانی کمیٹی کی یہ رپورٹ ایسے وقت میں آئی ہے جب مودی حکومت جدید لڑاکا طیارے رافیل کے سودے کو لے کر گھری ہوئی ہے۔ پبلک اکاؤنٹس کمیٹی نے وزارت دفاع سے فوری طور اس سمت میں ضروری اقدامات کرنے کی تجویز بھی دی ہے۔ پی اے سی میں بی جے پی اور کانگریس کے علاوہ ٹی ایم سی، شرومنی اکالی دل، بیجو جنتا دل، شیو سینا سے لوک سبھا اور راجیہ سبھا کی کل 22 اراکین شامل ہیں۔ کمیٹی نے اپنی رپورٹ میں کہا کہ ایئر فورس اپنی ضروریات کے لئے فی الحال مختصر مدتی عمل پر منحصر ہے۔ یہ صورت حال ٹھیک نہیں ہے اور جلد اس کا حل تلاش کرنا چاہئے۔ کمیٹی نے اپنی رپورٹ میں کہا کہ فضائیہ کی ضروریات کو دیکھتے ہوئے فوری طور پر اس پروجیکٹ کو پورا کرنا چاہئے۔ طویل مدت کے لئے بھارت اس زمرے کے طیاروں کی درآمد کو روکنے اور اسے بھارت میں ہی بنانے کو لے کر حکومت کو رہنما خطوط وضع کرنے چاہیے ۔