کسانوں کو انشورنس فراہم کرنے کی اسکیم زیر غور : وزیر زراعت شیوشنکر ریڈی
بنگلورو،4؍اکتوبر(ایس او نیوز) ریاستی وزیر زراعت شیوشنکر ریڈی نے کہا ہے کہ ریاست بھر میں کسانوں کو سرکاری اسکیموں سے استفادہ کے لئے مخصوص شناختی کارڈ کی فراہمی کے ساتھ ان کے لئے ایک نئی انشورنس اسکیم لاگو کرنے پر حکومت سنجیدگی سے غور کررہی ہے۔ آج شہر کے جی کے وی کے یونیورسٹی میں منعقدہ 63ویں یوم تاسیس کا افتتاح کرتے ہوئے انہوں نے کہاکہ کسانوں کی فصلیں سود مند ہو ں یہ یقینی بنانے کے لئے حکومت کی طرف سے ہر ممکنہ مدد فراہم کی جائے گی، اس کے باوجود بھی اگر خسارہ ہوجائے تو اس سے نپٹنے کے لئے انشورنس اسکیم لاگو کی جائے گی۔ وزیر موصوف نے کہاکہ زرعی شعبے میں جو نئی ٹیکنالوجی اپنائی جارہی ہے اس ٹیکنالوجی کو عام کسان تک پہنچانے کی ضرورت ہے۔ اس شعبے میں جاری تحقیق وترویج کا فائدہ اگر عام کسان تک پہنچ نہیں پایاتو یہ فضول ہے۔ وزیر موصوف نے کہا کہ اسرائیل نے زرعی شعبے میں تحقیق وترویج کے ذریعے جو پیش رفت حاصل کی ہے اس کو اپنانے کے لئے وزیر اعلیٰ ایچ ڈی کمار سوامی نے بھی بارہا زور دیا ہے۔ زرعی یونیورسٹیوں کو چاہئے کہ اس طرف توجہ دیں اور اس تحقیق سے کسانوں کو فائدہ پہنچانے کی کوشش کریں۔ انہوں نے کہاکہ اسرائیلی طرز کی کاشتکاری کی نمائش کرکے اس کے ذریعے کسانوں میں بیداری لانے کی ضرورت ہے۔ انہوں نے کہاکہ اسرائیل میں جس طرح بغیر سرمایہ کاری کے کاشتکاری کا نظام رائج ہے ریاست میں بھی اسی طرح کی کاشتکاری کے ذریعے کسانوں کو امداد پہنچائی جانی چاہئے۔