بنگلورو:29/اپریل(ایس او نیوز) وزیر تعلیمات، اوقاف واقلیتی بہبود تنویر سیٹھ نے بتایا کہ آر ٹی ای کے تحت داخلہ لینے والے بچوں سے حکومت کے ذریعہ مقرر کردہ فیس سے زیادہ رقم وصول کرنے والی پرائیویٹ اسکولوں پر دس لاکھ روپیوں کا جرمانہ عائد کیا جائے گا۔آن لائن قرعہ اندازی کے ذریعہ آر ٹی ای سیٹوں کی تقسیم کے عمل کا آغاز کرنے کے بعد انہوں نے بتایاکہ اس خصوص میں مسودہ قطعی مراحل میں ہے، اور عنقریب آر ڈی ننس جاری کیا جائے گا۔ انہوں نے بتایاکہ امسال 11917 پرائیویٹ اسکولوں میں دستیاب 1.29لاکھ نشستوں کیلئے 2.1 لاکھ عرضیاں موصول ہوئی ہیں، جن میں سے 2.02 لاکھ عرضیاں اہل قرار دی گئی ہیں۔ منتخب بچوں کے والدین کو دو دنوں میں بذریعہ ایس ایم ایس اطلاع دی جائے گی اور 10 مئی تک وہ اپنے بچوں کا داخلہ دلاسکتے ہیں۔10مئی کے بعد مخلوعہ نشستوں کی تفصیلات حاصل کرتے ہوئے دوسرے مرحلے میں سیٹوں کی تقسیم عمل میں آئے گی۔ انہوں نے بتایاکہ گزشتہ سال عرضی داخل کرتے وقت صرف پانچ اسکولوں کے انتخاب کی گنجائش تھی، مگر اس مرتبہ کسی بھی طرح کی گنجائش نہیں رکھی گئی تھی۔ انہوں نے بتایاکہ ضمنی انتخابات والے ننجنگڈھ اور گنڈل پیٹ حدود میں دستیاب سیٹوں سے کم عرضیاں موصول ہوئی تھیں، اسی طرح دیگر علاقوں میں بھی کم عرضیاں موصول ہوئی ہوں تو دوبارہ عرضیاں طلب کرنے پر غور کیا جارہاہے۔ وزیر تعلیمات نے واضح کیا کہ آر ٹی ای کوٹے میں منتخب ہونے والے طلبا کو اپنی ہی اسکولوں سے کتابیں اور یونیفارم خریدنے کیلئے کسی بھی ادارہ کا ذریعہ زبردستی نہیں کی جاسکتی، وہ اپنی پسند کے مطابق نوٹ بکس اور دیگر اشیاء خرید سکتے ہیں۔ اسی طرح ریاستی نصاب اپنانے والے اداروں کو مفت نصابی کتابیں فراہم کی جائیں گی۔ تقریباً 46 سی بی ایس ای اسکولوں کے ذریعہ آر ٹی ای کے تحت سیٹیں فراہم کرنے کے معاملے پر عدالت سے اسٹے حاصل کیا گیا ہے۔اس اسٹے کو ہٹانے کیلئے اقدامات کئے جائیں گے۔ انہوں نے بتایاکہ آر ٹی ای کیلئے آدھار کے لزوم کے باوجود تقریباً 25 ہزار عرضیاں،ووٹر شناختی کارڈ کی بنیاد پر حاصل کی گئی ہیں۔ اسی طرح عرضیوں میں جو خامیاں موجود تھیں انہیں درست کرنے کیلئے والدین کو تقریباً3.44لاکھ مرتبہ ایس ایم ایس بھی روانہ کئے گئے ہیں، سروا شکشا ابھیان کے پراجکٹ ڈائرکٹر ڈاکٹر پی سی جعفر نے بتایاکہ آر ٹی ای سیٹوں کی فیس میں اضافہ کے سبب اس مرتبہ حکومت پر تقریباً 350کروڑ روپیوں کا بوجھ پڑے گا۔محکمہئ تعلیمات کے اڈیشنل چیف سکریٹری اجئے سیٹھ نے بتایاکہ کنڑا ڈیولپمنٹ اتھارٹی کی ہدایت کے مطابق تمام اسکولوں میں کنڑا کے لزوم کیلئے اقدامات کئے جارہے ہیں۔