جبیل سعودی عربیہ میں بھٹکل کے افضال رکن الدین نے عصری تعلیم کے ساتھ مکمل کیا حفظ قران؛ بھٹکل جماعت نے دی مبارکباد
جُبیل 27/جون (ایس او نیوز) سعودی عربیہ کے شہر جبیل میں افضال ابن انصار رکن الدین نے عصری تعلیم حاصل کرنے کے ساتھ ساتھ قران حفظ مکمل کرنے پر بھٹکل مسلم جماعت منطقہ الشرقیہ نے نہایت خوشی کا اظہار کیا ہے اور افضال سمیت اُن کے والدین کو مبارکباد پیش کی ہے۔ فرزند کے تکمیل حفظ قران کی خوشی میں گذشتہ روز والد انصار رکن الدین نے جبیل کے ایک ہوٹل میں شاندار افطار پارٹی کا اہتمام کیا جس میں ختم قران کی مختصر تقریب بھی منعقد ہوئی۔
بھٹکل واطراف کے قریب 250 افراد مع اپنی فیملی اس تقریب میں شریک ہوئے اور افضال کو مبارکباد پیش کرتے ہوئے اُس کی بھرپور ہمت آفزائی کی ۔
حافظ افضال جُبیل کے انڈین انٹرنیشنل اسکول میں نویں جماعت کا طالب العلم ہے، انہوں نے اسکول کے فارغ اوقات میں تعلیم القران الجبیل میں مولانا حافظ حسان فقی بھائو ندوی کی زیرپرستی حفظ قران مکمل کیا۔
تقریب میں مولانا حافظ حسان ندوی نے سورہ فاتحہ اور سورہ مرسلات کی آخری آیات پڑھا کر رسم ختم قران کرائی۔
اس موقع پر بھٹکل مسلم جماعت منطقۃ الشرقیہ کے صدر مولانا حافظ عبدالباسط ندوی صاحب نے اپنے تاثرات پیش کرتے ہوئے بتایا کہ جناب انصار صاحب کے لئے واقعی خوشی کا موقع ہےاس لئے کہ حدیث میں ہے کہ قیا مت کے دن حافظ کے والد کو نور کا تاج پہنایا جائےگا۔ انہوں نے حافظ افضال اور ان کے والد انصار صاحب کو مبارکباد پیش کرتے ہوئے دعا کی کہ حافظ افضال کو انکے والدین کے لئے ذریعہ آخرت بنائے ، آخری سانس تک قرآن کو اپنے سینہ میں رکھنے اور اس پر عمل کرنے کی توفیق عطافرمائے. اٰمین