کپل مشرا کے بعد عاصم خان کا بڑا الزام، کیجریوال نے ہم سے بھی مانگا تھا 5کروڑ
نئی دہلی:8/مئی(ایس او نیوز/آئی این ایس انڈیا) کپل مشرا کے الزامات میں گھرے اروند کیجریوال کی مشکلیں مزید بڑھ گئی ہیں۔عام آدمی پارٹی کی حکومت میں سابق وزیر عاصم احمد خان نے الزام لگایا ہے کہ کیجریوال نے ان سے پانچ کروڑ روپے مانگاتھا۔خان کے مطابق، کیجریوال نے یہ پیسے پنجاب میں کیبل نیٹ ورک کو خریدنے کے لیے مانگا تھا۔خان کے مطابق، اتنے پیسے جمع نہ کرنے کے بعد دلیپ پانڈے نے ان کے ساتھ پارٹی کی میٹنگ میں ہاتھا پائی بھی کی۔مسئلہ پارٹی کے کچھ لیڈروں کے بیچ بچاؤ کے بعد ہی حل ہو پایا تھا۔عاصم خان کے مطابق،عام آدمی پارٹی دہلی اور پنجاب کے کیبل نیٹ ورک پر قبضہ کرنا چاہتی تھی، تاکہ کوئی اس کے خلاف خبر نہ چلا پائے،لیکن جب وہ کیجریوال کا یہ مطالبہ پورا نہیں کر سکے،تو انہیں جھوٹے الزام لگا کر ہٹا دیا گیا۔عاصم خان کا دعوی ہے کہ عام آدمی پارٹی کے اندر حکومت بننے کے 15دنوں بعد سے ہی لین دین کا کھیل چل رہا ہے اور ان کے پاس الزام ثابت کرنے کے لیے پختہ ثبوت موجود ہیں۔عاصم احمد خان کا دعوی ہے ان کو کیجریوال نے بدعنوانی کے جھوٹے الزام میں پھنسا کر وزیر کے عہدے سے ہٹا یاتھا۔خبروں کے مطابق خان کا کہنا ہے کہ ان کے پاس ایسا اسٹنگ ہے،جس میں امانت اللہ خان سمیت چار اور ممبر اسمبلی بتا رہے ہیں کہ کیجریوال نے 11لاکھ روپے دے کر ان کے خلاف جھوٹا اسٹنگ آپریشن کروایا تھا۔قابل ذکرہے کہ پیشے سے بلڈر عاصم احمد خان عام آدمی پارٹی کے ٹکٹ پر پرانی دہلی کی مٹیا محل سیٹ سے ممبر اسمبلی منتخب ہوئے تھے، انہوں نے کانگریس کے قدآور لیڈر شعیب اقبال کو 26ہزار سے زیادہ ووٹوں سے شکست دی تھی۔اس کے بعد کیجریوال نے انہیں خوراک اور شہری فراہمی اور اقلیتی محکموں سمیت کئی اور وزارت سونپی تھی۔خان عام آدمی پارٹی کے اقلیتی سیل کے رکن بھی رہ چکے ہیں، لیکن 2015میں ایک ایسا آڈیو سامنے آیاتھا، جس میں وہ مٹیا محل میں غیر قانونی تعمیر کے لیے 6سے 8لاکھ روپے کی رشوت کا مطالبہ کرتے ہوئے سنے گئے۔اس کے بعد کیجریوال نے انہیں کابینہ سے ہٹا دیا تھا۔ادھر، عام آدمی پارٹی کے باغی ممبر اسمبلی کرنل دیویندر سہراوت بھی عاصم خان کی حمایت میں اتر آئے ہیں۔ان کا کہنا ہے کہ اب کیجریوال بے نقاب ہو گئے ہیں۔سہراوت کی مانیں، تو عام آدمی پارٹی میں کیجریوال کی نافرمانی کرنے والوں کو جھوٹے الزامات میں پھنسا دیا جاتا ہے۔