نئی دہلی،15؍اکتوبر (ایس او نیوز؍ آئی این ایس انڈیا)مشرقی دہلی کے غازی پور لینڈ فیل میں لگی آگ پر سات گھنٹے کی سخت مشقت کے بعد آج علی الصبح قابو پایا لیا گیا ۔ فائر بریگیڈ محکمہ کے ایک افسر نے بتایا کہ واقعہ میں کوئی جانی نقصان نہیں ہوا ہے۔ کل شام تقریبا پانچ بجکر 50 منٹ پر لینڈ فیل میں شدید آگ لگ گئی تھی ۔ اسی جگہ حالیہ دنوں کچرے کا ڈھیر منہدم ہو جانے کی وجہ سے حادثہ پیش آگیا تھا جس میں کئی افراد ہلاک ہوئے تھے ۔ دہلی فائر بریگیڈ سروس کے اہلکار نے کہا فائر بریگیڈ کی پانچ گاڑیوں کو جائے حادثہ کے لئے روانہ کیا گیا اور آخر کار صبح قریب ڈیڑھ بجے آگ پر قابو پا لیا گیا۔کچرے کا ڈھیر گرنے کے بعد نائب گورنر انل بیجل نے اسے بند کرنے کے احکامات جاری کئے تھے ۔جس کے بعد 45 میٹر بلند اس لینڈ فیل کو بند کرنے کا حکم جار ی کیا تھا ۔ یہ کچرے کا پہاڑ سال 2002 میں ہی بھر چکا تھا او رانتظامیہ اس کے متبادل جگہ کی تلاش بھی کر رہی ہے حالانکہ این جی ٹی کی منظوری لازمی ہے ۔مشرقی دہلی میونسپل کے زیر انتظام یہ لینڈ فیل سائٹ 29 ایکڑ سے زیادہ کے علاقے میں پھیلی ہے اور اسے 1984 میں شروع کیا گیا تھا۔ حکام کے مطابق کچرے کے ڈھیر کے لئے منظور شدہ اونچائی 20 میٹر ہے اور غازی پور سائٹ ہر دن یہاں 2500۔3000 میٹرک ٹن کوڑا ڈالا جاتا ہے ۔