کروپاڑی کے عبدالجلیل کے قاتلوں کی گرفتاری نہ ہونے پرناراض کانگریسی کارکنان کا ضلع دکشن کنڑا نگراں کار وزیرکاگھیراؤ
وٹلا/منگلورو:26/اپریل(ایس اؤنیوز)کروپاڑی گرام پنچایت کے نائب صدر اے عبدالجلیل کا قتل ہوکر ہفتہ گزرچکا ہےلیکن ابھی تک قاتلوں کی گرفتار ی عمل میں نہیں آئی ہے، اس بات پر ناراض مقامی کانگریسی کارکنان اور عوام نے ضلع نگراں کار وزیر بی رماناتھ رائی کی کار گھیراؤ کرتےہوئے سخت برہمی کا اظہار کیا۔
عبدالجلیل کا انتقال ہوکر دس دن ہونے پر ان کے گھرمیں منعقدہ پروگرام میں شرکت کے بعد لوٹ رہے وزیر رماناتھ رائی کی کار کو کانگریسی کارکنان نے قریب 10منٹ تک گھیراؤ کرکے روک کر اپنا سخت اعتراض جتایا۔ کارکنوں نے وہیں نگراں کاروزیر کو کھری کھری سناتے ہوئے کہاکہ وٹلا کے کچھ پولس کا رویہ صحیح نہیں ہونے کو لے کر شکایت کی گئی تھی لیکن ابھی تک اُن پولس اہلکاروں کے خلاف ہمارے عوامی نمائندوں کو کارروائی کرنا ممکن نہیں ہوسکا ہے۔
عوام نے اس بات پر سخت ناراضگی ظاہر کی کہ زندگی بھر پارٹی کا وفادار کارکن رہتے ہوئے پارٹی کے لئے زندگی گنوانے والے عبدالجیل کے گھروالوں کے متعلق کوئی بھی عوامی نمائندہ توجہ نہیں دے رہا ہے، عوام نےسخت برہمی کا اظہار کرتے ہوئے سوال کیا کہ آپ لوگوں کو صرف ووٹ چاہئے ہے نا! وزیر رماناتھ رائی نے کارکنوں سے کہاکہ قاتلوں کی گرفتاری کےلئے محکمہ پولس پر دباؤ بنایاگیا ہے ، ملزموں کا پتہ لگانے کے لئے پولس نے جال بچھایا ہے، ہمیں اعتماد ہے کہ بہت جلد ملزم گرفتار ہونگے، اتنا کہنا تھا کہ عبدالجلیل کے خاندان والوں نے آگے بڑھ کر وزیر موصوف کی کار کو جانے کے لئے راستہ بنایا۔
ایسے میں خبر ملی ہے کہ علاقہ کے سخت ناراض نوجوانوں اور شہریوں نے 28اپریل سے غیر معینہ مدت کی ہڑتال کا اعلان کرتے ہوئے کنیان اور کروپاڑی بند منانے کا فیصلہ کیا ہے۔ان لوگوں کا کہنا ہے کہ پولس محکمہ کو ملزموں کا پتہ ہونے کے باوجود 7دنوں تک ان کی گرفتاری نہیں کی گئی ہے، اس کو دیکھتے ہوئے احتجاج منظم کیاجارہا ہے۔ علاقہ کے لوگوں کا سوال ہے کہ 48گھنٹوں میں ملزموں کی گرفتار ی کا دعویٰ کرنے والی پولس ابھی تک کیا کررہی ہے، نوجوانوں نے واضح کیا کہ اگر ملزموں کی گرفتاری ہوتی ہے تو پھر بند واپس لے سکتے ہیں۔