بنگلورو،18؍فروری(ایس او نیوز) 2025تک ملک میں دواؤں کی پیداوار کے شعبے پر سرمایہ کاری اور تجارت 50کھرب ڈالر سے متجاوز ہوجائے گی، یہ بات آج مرکزی وزیر برائے کیمیا وکھاد سدانند گوڈا نے کہی۔ شہر میں چارویں بین الاقوامی فارما انڈیا نمائش کا افتتاح کرتے ہوئے انہوں نے کہاکہ ادویات کے شعبے میں حکومت ہند نے صد فیصد غیر ملکی سرمایہ کاری کی اجازت دی ہے، تاکہ یہ شعبہ تیزی سے آگے بڑھ سکے۔انہوں نے کہاکہ ہندوستان میں 50 فیصد دوائیں امریکہ اور برطانیہ سے امپورٹ کی جاتی ہیں ، اس کے علاوہ جرمنی سے بھی دواؤں کا بہت بڑا ذخیرہ ہندوستان لایا جاتا ہے۔دواؤں کی تیاری اور میڈیکل آلات کے مینو فیکچرنگ کے شعبے میں میک انڈیا پروگرام کے تحت ہندوستان نے بھی غیر معمولی پیش رفت حاصل کرلی ہے۔