بھٹکل،20؍مارچ(ایس او نیوز)شہر کے تازہ دم قلمکاروں کوادارہ ادب اسلامی کی تحریک سے وابستہ کرنے کی ایک کوشش کے طور پرادارہ ادب اسلامی ہند شاخ بھٹکل کی ایک خصوصی شعری نشست 8مارچ کو دعوت سنٹر میں منعقد ہوئی، جس میں شہر کے کہنہ مشق شعرأ کے علاوہ نو آموز اور تازہ دم شعرأ کو مدعو کیا گیا تھا۔ 

صدر مقامی جناب سید اشرف برماور کی صدارت میں ایس آئی اوکے مقامی سکریٹری حافظ ثناء اللہ اسدی کی تلاوت مع ترجمہ سے محفل شعر و سخن کا آغاز ہوا۔ جناب ڈاکٹر محمد حنیف شبابؔ (رکن مجلس اعلیٰ ادارہ ادب اسلامی ہند) نے نوجوان شعرأ اور ادب نواز سامعین کے سامنے ادارہ ادب اسلامی کا اجمالی تعارف پیش کرتے ہوئے کہا کہ بشمول اردو دیگرعلاقائی زبانوں میں بھی مقصدی و تعمیری ادب کو فروغ دینے کے لئے قلمکاروں کو آمادہ کرنا اور ان کے لئے پلیٹ فارم مہیا کرنا وقت کا تقاضا ہے اور ادارہ ادب اسلامی ہند اسی سمت میں سرگرم عمل ہے۔آپ نے شہر کے نوجوان شعرأ سے اپیل کی کہ وہ اس تحریک سے منسلک ہوجائیں اور اپنے فکر و فن کی تطہیر کے ساتھ ادبی محاذ پر تعمیری خدمات انجام دینے والے قافلے کا حصہ بن جائیں۔

بعدازاں جناب سید اشرفؔ برماور، عبدالعلیم شاہینؔ ، ڈاکٹر محمد حنیف شبابؔ ، مولوی سید سالکؔ ندوی،جناب اقبالؔ سعیدی، جناب حنیف شاہ شبنمؔ ، جناب مصطفی تابشؔ ، مولوی عبدالمغنی ندوی، جناب محمد الیاس آفاقؔ ، جناب عبداللہ رفیقؔ ، جناب سید عفان بافقی، جناب عرفان سدی باپا،جناب مولوی شادؔ جامعی ندوی، جناب مولوی انیس ؔ ندوی، جناب عنایت اللہ خان، جناب سہیل عرشیؔ ، جناب علی باشاہ بسملؔ وغیرہ نے اپنے کلام سے سامعین کو محظوظ کیا۔

اپنے صدارتی خطاب میں جناب سید اشرف برماور نے بھٹکل کے ادبی افق پر ابھرتے ہوئے تازہ دم شعرأ کی بڑی تعداد شریک محفل ہونے پر مسرت کا اظہار کرتے ہوئے کہا کہ ایسا لگتا ہے کہ بھٹکل میں ادب اسلامی کی سرگرمیوں کا سابقہ دور پھر سے لوٹ آیا ہے۔