بنگلورو:20/مئی(ایس او نیوز) وزیر اعلیٰ سدرامیانے کہاکہ آنے والے اسمبلی انتخابات میں کانگریس پارٹی امیدواروں کو ٹکٹ ان کے حلقوں میں عوامی رائے معلوم کرکے ہی تقسیم کئے جائیں گے۔میسور میں اخباری نمائندوں سے بات چیت کرتے ہوئے انہوں نے کہاکہ  اگلے انتخابات سے قبل کانگریس پارٹی ایک نجی ایجنسی کے ذریعہ ہر اسمبلی حلقہ کی سیاسی صورتحال کا خفیہ سروے کروائے گی۔اس سروے کی بنیاد پر جیت کے اہل ترین امیدوار کی نشاندہی کرکے اسی کو ٹکٹ دیا جائے گا۔ انہوں نے کہاکہ اس سلسلے میں آنے والے دنوں میں کانگریس امور کے نئے انچارج وینو گوپال دوبارہ ریاست کے دورہ پر آئیں گے اور اس مرحلے میں کے پی سی سی صدر ڈاکٹر جی پرمیشور اور دیگر کانگریس قائدین کی طرف سے تمام امور پر تبادلہئ خیال کیا جائے گا۔ہر اسمبلی حلقہ کی صورتحال کا جائزہ لینے کیلئے مشاہدین کی ٹیمیں روانہ کی جاچکی ہیں۔ مشاہدین کی رپورٹ پارٹی کو ملنے کے بعد اس ضمن میں اگلی کارروائی کی جائے گی۔