نتیش کمار نے شرد یادو سے کہا، بی جے پی سے اتحاد قبول کریں یااپناراستہ دیکھیں
نئی دہلی11/اگست(ایس او نیوز/آئی این ایس انڈیا)بہارمیں جے ڈی یو لیڈر شرد یادو ریاست میں بی جے پی کے ساتھ مل کر نتیش کمار کی حکومت بنائے جانے کی مخالفت کر رہے ہیں۔ ان کی مخالفت اب کئی بار عوامی ہوچکی ہے۔اس کے جواب میں بہارکے وزیراعلیٰ نتیش کمارنے کہاکہ جنتا دل(یونائیٹڈ)کے سینئر لیڈر شرد یادو اپنا راستہ منتخب کرنے کے لیے آزادہیں۔ بتایاجا رہاہے کہ نتیش کمار نے یہ صاف کر دیا ہے کہ شرد یادو یا تو بی جے پی کے ساتھ اتحاد قبول کریں یا پھر اپنا راستہ چن لیں۔ نتیش کمارکایہ بیان شرد یادو طرف بہار میں جنتادل (یو) اور بی جے پی کے اتحاد کے خلاف ناراضگی جتائے جانے کے بعدآیاہے۔نتیش کمارنے یہاں پارلیمنٹ کے باہر نامہ نگاروں سے کہاکہ پارٹی نے اتفاق رائے سے فیصلہ لیاہے۔ وہ (شردیادو)اپناراستہ منتخب کرنے کے لیے آزادہیں۔اس سے پہلے شردیادونے دہلی سے پٹنہ پہنچنے پر ہوائی اڈے پر صحافیوں کوبتایا تھا کہ وہ اب بھی مہاگٹھ بندھن کے ساتھ ہیں، جسے بہار کی 11 کروڑ عوام نے 2015 کے اسمبلی انتخابات میں پانچ سال حکومت کامینڈیٹ دیاتھا۔