نئی دہلی، 28؍اگست(آئی این ایس انڈیا )دہلی میں کروڑوں روپے کے ٹینکر گھوٹالے کی جانچ کر رہی دہلی کی اینٹی کرپشن بیور(اے سی بی)نے سابق وزیر اعلی شیلا دکشت کو آج 15سوالوں کی ایک لسٹ سونپی اور ان سے ان سوالوں کا جواب اگلے چند دن میں دینے کو کہا۔اے سی بی کے افسران کی ایک ٹیم یہاں نظام الدین علاقے میں واقع شیلا دکشت کی رہائش گاہ پہنچی اور گھوٹالے پر سوالوں کی ایک فہرست انہیں سونپی ۔اے سی بی کے ایک سینئر افسر نے کہاکہ ہم نے ان سے سوالوں کے جواب اگلے دوتین دن میں دینے کو کہا ہے۔شیلا نے حالانکہ اے سی بی ٹیم کو بتایا کہ وہ ان سوالات کے جواب فوری طور پر نہیں دے پائیں گی اور ان کو مزید وقت چاہیے ۔اروند کیجریوال کی زیر قیادت آپ حکومت نے دہلی جل بورڈ کی طرف سے 2012میں 385اسٹین لیس اسٹیل کے پانی کے ٹینکر کی خریداری میں ہوئی بے ضابطگی کی تحقیقات کے لیے گذشتہ سال جون میں ایک فیکٹ فائنڈنگ کمیٹی کا قیام کیا تھا۔2012میں شیلا دکشت دہلی میں کانگریس حکومت کی قیادت کر رہی تھیں۔دہلی حکومت نے گھوٹالے پرفیکٹ فائنڈنگ کمیٹی کی ایک رپورٹ گزشتہ جون میں لیفٹیننٹ گورنر نجیب جنگ کو بھیج دی تھی جس کے بعد معاملے میں ایک ایف آئی آر درج کی گئی۔