بنگلورو،6؍اکتوبر(ایس او نیوز؍عبدالحلیم منصور) ریاستی وزیر داخلہ رام لنگا ریڈی نے کہاکہ انسداد کرپشن بیورو کے افسران کو محکمۂ انکم ٹیکس کے افسران کے ٹھکانوں پر چھاپوں کے اختیارات ہیں یا نہیں اس سلسلے میں ماہرین قانون سے رائے طلب کی جائے گی۔ اخباری نمائندوں سے بات چیت کرتے ہوئے انہوں نے کہاکہ انسداد کرپشن بیورو کے دائرۂ اختیارکے متعلق ماہرین قانون سے مکمل مشورہ لیا جائے گا ۔اس بیورو کو انکم ٹیکس افسران پر چھاپوں کا اختیار ہے یا نہیں اس پر اب تک کوئی بحث نہیں ہوئی ہے ، کل سے یہ معاملہ مختلف حلقوں میں اٹھایا جارہاہے، اسی لئے ریاستی حکومت بھی ماہرین قانون سے مشورہ لے کر ہی فیصلہ کرے گی۔ انہوں نے کہاکہ مرکزی حکومت کی طرف سے کھلے عام انکم ٹیکس، انفورسمنٹ ڈائرکٹوریٹ ، سی بی آئی اور محکمۂ ٹیلی مواصلات کا غلط استعمال کیا جارہاہے۔اس وجہ سے لوگوں میں یہ شبہ پیدا ہوگیا ہے کہ ریاستی حکومت بھی اے سی بی کا غلط استعمال کررہی ہے، لیکن ایسا نہیں ہے۔ ریاستی حکومت کے خلاف بی جے پی کے بڑھتے ہوئے احتجاجات کو مضحکہ خیز قرار دیتے ہوئے رام لنگا ریڈی نے کہاکہ بی جے پی کے قومی صدر امیت شا نے حالیہ بنگلور کے دورہ کے دوران ریاستی بی جے پی کے قائدین کو اوور ٹائم کام دے دیا اور ان سے کہا ہے کہ حکومت کے خلاف بے بنیاد ہی سہی الزامات لگاتے رہیں۔ اسی لئے مجبوراً ریاستی بی جے پی قائدین امیت شا کی بات رکھنے کیلئے حکومت پر بے تکے الزامات لگاتے پھر رہے ہیں۔ مرکزی حکومت اپنے اختیارات کا کس طرح غلط استعمال کررہی ہے اس سے ملک کا بچہ بچہ واقف ہے۔ ریاستی حکومت پر اے سی بی کے غلط استعمال کا الزام لگا کر بی جے پی اپنی کرتوتوں پر پردہ ڈالنا چاہتی ہے۔ انہوں نے کہاکہ اگر بی جے پی والوں کو اے سی بی کے غلط استعمال کا یقین ہے تو پھر ان کی طرف سے کی جارہی ٹیلی فون ٹیپنگ میں اس بات کا پتہ لگالیں ، کسی بھی حال میں ریاستی حکومت اے سی بی کا غلط استعمال نہیں کرے گی، بلکہ صرف بدعنوان عناصر پر ہی کارروائی کی جائے گی۔ صحافی گوری لنکیش کے قاتلوں کو جلد گرفتار کئے جانے کا یقین ظاہر کرتے ہوئے مسٹر ریڈی نے کہاکہ خصوصی تحقیقاتی ٹیم اس معاملے میں کافی آگے بڑھ چکی ہے۔ اس سلسلے میں تفصیلات پر وہ بحث کرنا نہیں چاہتے۔ منگلور میں ایک بی جے پی کارکن کے قتل کو سیاسی رنگ دئے جانے کی کوشش کی مذمت کرتے ہوئے انہوں نے کہاکہ ایک ہی فرقہ کے لوگوں کے درمیان ہوئی جھڑپ کے نتیجہ میں یہ قتل ہوا ہے ، اس قتل کو سیاسی رنگ نہ دیا جائے۔ ریاست میں نظم وضبط کی صورتحال کو اطمینان بخش قرار دیتے ہوئے مسٹر ریڈی نے کہاکہ منگلور میں حالیہ دنوں میں بی جے پی نے حالات بگاڑنے کی کوشش بسیار ضرور کی، لیکن ریاستی حکومت نے ایسا ہونے نہیں دیا۔ شہر میں بارش کی تباہ کاریوں کے متلعق مسٹر ریڈی نے کہاکہ بنگلور کے تمام وزراء بشمول جناب روشن بیگ ، کے جے جارج اور دیگر مل کر عوام کوبارش کی مشکلات سے نکالنے کیلئے کام کررہے ہیں۔