ریاست میں تمام طلبہ کو مفت بس پاس فراہم کیے جانے کا مطالبہ کرتے ہوئے اے بی وی پی نے نکالی احتجاجی ریلی
بھٹکل5؍جون (ایس او نیوز)اکھل بھارتیہ ودیارتھی پریشد(اے بی وی پی )نے ریاست کے تمام طلبہ کو مفت بس پاس فراہم کرنے کا مطالبہ کرتے ہوئے آج منگل کو بھٹکل میں احتجاجی ریلی نکالی اور اسسٹنٹ کمشنر کو میمورنڈم پیش کیا۔
میمورنڈم میں مطالبہ کیاگیا ہے کہ سابقہ حکومت میں ایس سی ؍ایس ٹی طبقات سے تعلق رکھنے والے طلبہ کو بس کے سفر کے لئے مفت پاس فراہم کیے جاتے تھے۔تعلیمی سال2018-19میں تمام طلبہ کو مفت بس پاس دئے جانے کا وعدہ کیاگیا تھا۔ مگر موجودہ سرکار اس کے برخلاف اقدام کررہی ہے۔ طلبہ کی پڑھائی اور ان کی سہولت کو سامنے رکھتے ہوئے تمام طبقات کی طلبہ کو مفت پاس دینے کے احکامات فوری طور پرجاری کیے جائیں۔یہ مطالبہ بھی کیاگیا ہے کہ دیہی علاقوں سے پاس حاصل کرنے والے طلبہ کو شہری علاقوں میں بھی مفت سفر کرنے کی اجازت دی جائے۔ اور جن دیہی علاقوں میں بس سروس نہ ہو، وہاں پر طلبہ کی سہولت کے پیش نظر بس سروس شروع کردی جائے۔