مسلم نمائندگی اور قیادت کو ایک اور جھٹکا، قمر الاسلام کا انتقال پرملال:عبدالحنان
بنگلورو18؍ ستمبر ( پریس ریلیز؍ایس او نیوز؍) سوشیل ڈیموکریٹک پارٹی آف انڈیا کے ریاستی صدر عبدالحنان نے اپنے اخباری اعلامیہ میں رکن اسمبلی اور سابق ریاستی وزیر قمر الاسلام کی رحلت پر گہرے دکھ اور غم کا اظہار کیا ہے۔ سوشیل ڈیموکریٹک پارٹی کے ریاستی و ضلعی عہدیداران و کارکنان کی جانب سے مرحوم کے اہل خانہ اور تمام متعلقین کو تعزیت ادا کی جاتی ہے اور دعا ہے کہ اللہ تعالی قمر الاسلام کی مغفرت فرمائے اور ان کی سماجی خدمات کو قبول فرمائے۔ جناب قمر الاسلام صاحب گلبرگہ اسمبلی حلقہ کے نمائندے ہونے کے باوجود شمالی کرناٹک کے مسلمانوں میں ایک منفرد قائد کے طور پر پہچانے جاتے تھے۔ ان کی رحلت سے مسلم نمائندگی اور قیادت کو ایک بہت بڑا جھٹکا لگا ہے اور دوسری صف کی نمائندگی اور قیادت کی اہمیت کو سمجھتے ہوئے ہمیں تعزیت کے ساتھ ساتھ ہمارے کردار اور ذمہ داریوں کی طرف بھی توجہ دینا ہے۔