نئی دہلی :16/دسمبر (ایس او نیوز/آئی این ایس انڈیا) دہلی پولیس کے مطابق قومی دارالحکومت میں اغواء برائے تاوان کے واقعات میں اضافہ دیکھاجارہا ہے اور پولیس کے سامنے اہم چیلنج مغوی کی حفاظت کو یقینی بنانے کی ہوتی ہے۔دہلی پولیس کے اعداد و شمار کے مطابق اس سال نومبر تک دارالحکومت میں اغوا کی 19 وارداتیں درج کی گئی ہیں،جبکہ گزشتہ سال اس مدت میں 14 ایسے معاملے سامنے آئے تھے۔پولیس نے بتایا کہ اغوا کے معاملات میں ان کی اولین ترجیح مغوی افراد کی حفاظت کو یقینی بنانے کی ہوتی ہے۔ایک سینئر پولیس افسر نے بتایا کہ ہمیں کئی امور کے تحت سخت احتیاط برتنی ہوتی ہے۔ ہمارے لیے خصوصی چیلنج یہ ہوتاہے کہ بغیر کسی نقصان یا کسی چوٹ کے مغوی افراد کو بچا یاجائے۔ہمیں اغواکار کی سرگرمیوں پر کڑی نظر رکھنی ہوتی ہے۔پولیس کے مطابق اس طرح کے معاملات میں مغوی افرادکے اہل خانہ کو اعتماد میں لینا مشکل ہوتا ہے۔پولیس ڈپٹی کمشنر (جرائم) جی رام گوپال نائیک کے مطابق کہ متاثرین کے والدین کو اعتماد میں لینا اکثر مشکل بھرا کام ہوتا ہے۔ اس سال اکتوبر میں دہلی یونیورسٹی کی گریجویٹ پہلے سال کی ایک طالبہ نے اپنے نابالغ بھائی کے ساتھ اپنے مکان مالک کے تین سال کے بیٹے کا مبینہ طور پر اغوا کر لیا اور 50 لاکھ روپے تاوان طلب کرڈالے ۔اگرچہ بچے کو 24 گھنٹے کے اندر محفوظ بچالیا گیا۔اس معاملہ میں طالبہ کو گرفتار کر لیا گیا اور اس کے بھائی کو بھی پکڑ لیا گیا۔